福斯傳媒集團喺天際100舉行發佈會，宣佈FOX+喺香港正式登場，仲係亞洲首個及喺唯一個串流式一次過提供同美國同步播放嘅熱門美劇、荷李活影片、直播體育賽事等。惠英紅以中性打扮出席：「最緊要做番自己，舒服就得，每次形象都幫我打扮到好女性化，低胸。」係咪想你着得性感啲，多啲異性埋身？惠英紅話：「都唔係嘅，希望唔好咁硬淨囉，所以將我扮得女性化啲，自己都好想拍拖，十幾廿年冇拍拖，都冇人追。」
記者叫佢要主動啲，惠英紅自嘲太自閉。問到係咪畀人感覺太打得？佢話：「以前都有人咁講㗎，但原來識落我好女人，唔止煮飯得，琴棋書畫、針線、織冷衫都識，以前開美容院，按摩師牌我都有。」要求係咪好高？惠英紅把口否認：「冇㗎，總之四肢健全就得，唔使靚仔。」鍾唔鍾意小鮮肉？佢表示：「我唔愛呀，我要熟啲，因為我鍾意人照顧，好想做隻波斯貓，大個好啲。」
有冇朋友介紹相睇？佢承認：「都有㗎，但我嫌太老囉，最好同我一樣大，或者大我幾年，我57歲，70幾80歲嗰啲真係唔得呀，總之大家思維要接近，因為我喺江湖跑咗好多年，女人易老啲，我鍾意羅拔迪尼路嘅類型，之前去紐約，都去勻晒佢所有舖頭，食晒佢嘅菜都見唔到佢，但我個妹去一次就撞到佢，連佢間舖喺黑人區咁危險我都去，但都撞唔到佢囉。」
 攝影：沈健程 |  小紅姐話自己都好想拍拖，但就唔愛小鮮肉喎！ |  惠英紅話自己其實係女人。 |
 惠英紅、葉念琛同王貽興 |  吳鎮宇 |  黃心美 |
 張可頤 |
