余香凝最近推出新歌《簡單情歌》，日前喺鰂魚涌接受本報專訪，佢透露原本想取名為《LA LA LA LOVE SONG》，但係撞咗木村拓哉主演嘅劇集《悠長假期》主題曲，只好放棄，余香凝話：「我好鍾意其中一句歌詞『共你簡單愛下去』，我覺得愛情最緊要係簡單，所以決定叫呢首歌做『簡單情歌』。」
講到佢同男友陳家樂嘅甜蜜愛情故事，余香凝甜笑咁表示，可以用「簡單」來形容：「佢心地好善良，雖然太善良會被人呃，但係我覺得呢個就係我欣賞佢嘅嘢，同佢相處係好簡單，其實同最鍾意嘅人一齊，喺屋企睇戲，甚至乎佢睇書，我做其他嘢，但大家係共渡緊呢個時光，唔會覺得悶，唔會覺得點解佢唔帶我出街。」
今年3月余香凝同陳家樂不幸遇上嚴重車禍，當時余香凝面部受傷，鼻骨爆裂，陳家樂曾經承諾會照顧女友下半世，余香凝甜笑咁話：「係幾感動，始終大家都經歷過嗰一刻生死，塊面會點，個人會點，就係嗰兩秒之間發生嘅事，呢個人就係喺我身邊一齊經歷嘅人，所以佢講呢句嘅時候，我係有啲surprise，佢仲要對住其他人講。」
自細就喜歡運動嘅余香凝，讀書時期已經接觸足球同排球，佢話：「我係幾男仔頭，以前唔怕曬黑，又唔會理肥唔肥，有次試過落住紅雨踢波，中學嘅時候就係排球校隊，後來中五嘅時候就入行，之後就識得貪靚，嫌自己下半身有啲粗壯，pat pat好大，大脾又粗，於是開始唔食嘢唔做運動嘅唔健康減肥，買一個麥包，分好多餐食，最後梗係見暈啦，當時嘅我係又瘦又腫，於是我去蒸身，但係我蒸15分鐘都唔係好出汗，有人就叫我做運動出汗，我就再返去做運動嘅懷抱，均衡飲食。」
現時一直keep住做運動嘅佢，滿唔滿意自己身材﹖佢笑住話：「未滿意架，我想臀部再翹啲，之前拍《萬水千山縱橫》飾演扒龍舟教練，我事前搵咗男導師訓練我，點知佢扁到我一文不值，同佢一齊側面照鏡，佢pat pat仲翹過我，我想著衫好睇啲。」經常做運動，唔怕上圍縮細﹖佢笑住指：「暫時都還好，夠用，如果我著tube dress都托得起。」對於佢曾經講過如果遇到好劇本，唔介意全裸演出，佢話：「我覺得演員幾偉大，要準備自己所有情緒、或者身體任何一部份，攞出嚟做戲畀人睇，如果劇本真係好好，我真係唔介意，(家樂呢？)我諗唔會啩，大家都係專業演員。」
