精通泰國嘅旅遊達人胡慧沖(Roger)，早前接受《蘋果》專訪前曾經講過，雖然佢只係拎工作簽證（Working Visa）喺泰國做嘢，不過基本上已經當咗泰國係佢嘅家，講到有冇諗諗過落地生根？點知佢話：「搞掂自己先喇，我事業都未有成，仲係奮鬥期，事業有成乜都有，做好自己先喇，唔通餓死老婆瘟臭屋咩！希望80歲之前都可以事業有老成。」(新聞連結：http://bit.ly/2hBQnXs)
近期Roger孖住冬蔭妹一齊做節目，日前仲同埋冬蔭妹一齊返香港做宣傳，《蘋果》發現佢哋兩個做完活動之後，返酒店小休後再去廟街！其間Roger全程呵護備至，女嘅表現亦相當受落！大約8時左右，Roger同冬蔭妹喺酒店上咗一間7人車，直接落咗去廟街，Roger先帶咗冬蔭妹去行攤擋，雖然喺泰國都有唔少夜市，但係冬蔭妹嘅表現都好開心，Roger亦都好似做節目咁，邊行邊介紹條街有啲乜嘢特色，冬蔭妹仲自備自拍神器，同Roger一齊自拍！
行到啲睇相嘅攤檔，Roger幫冬蔭妹搵咗個女相士睇掌，聽完Roger嘅翻譯之後，冬蔭妹嘅表現好開心，仲見佢對住Roger甜笑兼拍打咗幾吓，狀甚親䁥！睇完之後，佢哋行咗去隔離啲攤擋睇街頭賣唱，之後慢慢向廟街嘅另一邊進發！話晒廟街係香港嘅旅遊勝地，自然人多車多，於是Roger都好gentleman咁保護冬蔭妹！
之後Roger帶咗冬蔭妹去食地道小食，佢哋兩個好合拍咁一個抺筷子、一個幫手挾嘢食，睇到Roger食到滿咀都係油，冬蔭妹拎咗張紙巾幫佢抹咀添！其間有fans認得Roger，佢哋都好大方咁影相，跟住佢哋又去咗牌坊影相，為咗o氹得美人歡笑，Roger跖上跖落咁幫女方影相，影完相又會俾過目，如果唔滿意嘅話就再影過！之後Roger又走去買雞蛋仔！
本來買雞蛋仔唔係嘢特別事，但係最特別嘅地方，就係買完雞蛋仔之後，Roger除咗自己件白色外套，舖咗喺路邊石壆畀冬蔭妹坐，佢自己就坐喺隔離，佢哋兩個密密傾咗一陣，Roger幫冬蔭妹拎手袋走人！
事後Roger接受訪問，佢話：「其實今次我係同冬蔭妹返嚟做宣傳，做完嘢咪盡地主之意，帶佢周圍走去食吓嘢！」Roger話仲話帶佢去睇吓相：「相士話佢嚟緊嘅事業線，唔係，事業好好，仲話佢會有一個好有錢嘅男朋友，我呢個唔會係我呱？」
講到同冬蔭妹嘅關係，佢話：「拍擋囉，佢係一個幾好嘅女仔，靚嘅女仔梗係望多兩眼，俾啲空間大家喇，正所謂鮮花插在牛糞上，我未必襯得起佢！
 攝影：吳耀輝、孔志豪 |  |  |
 |  |  |
 |  |  |
 |  |  |
 |
