只係相隔一個月，好多嘢都可以變。
上個月大台先喺台慶之前，秘密下達「禁奶令」，唔想藝人賣弄身體、或者係節目入面有太多性感鏡頭。（新聞連結：http://bit.ly/2ju3Pkj
）
禁奶令言猷在耳，但為咗配合後日舉行嘅《勁歌》總選，大台又用番舊招……港姐&性感拍MV。
其實呢幾日大台喺facebook已經逐少逐少咁放風，搵咗黃心穎、蔡思貝、馮盈盈、邵珮詩同張寶兒5位港姐分別拍片，其中見到心穎BB着小背心露大大條事業線最性感，仲有同赤裸上身嘅林師傑攬埋一嚿，喺「禁奶令」下，意識真係幾大膽嘅。
呢次5女拍嘅MV，正正係《降魔的》主題曲《到此一遊》，除咗有黃心穎低胸肉搏林師傑，仲有張寶兒玩蛇、馮盈盈打喪屍咁，總之就係各自有一個style，另外仲有part係一齊扮韓國女團嘅跳舞MV，即係貼身衫/短裙露下腿，再擺啲性感pose咁……不過大家都明，5個女仔並唔係女團成員，所以除咗跳舞唔齊之外，拍埋一齊身材都幾參差。
黃心穎今日回覆傳媒時都認MV會係幾性感：「我哋跳舞個part俾咗好多心機，睇番都係性感，襯番紋身女嘅造型，都幾有型吖，都未試過。」咁係咪轉型做歌手？黃心穎就話第一次拍MV幾得意：「哈哈，我都唔知，呢樣嘢等公司安排，自己都鍾意唱歌，有時間我都會去學唱歌。」
