新城勁爆頒獎禮2017今晚假灣仔會展，今年共頒發61個獎，當中包括勁爆歌曲勁爆男、女歌手、樂隊、組合、唱作人等。
2235：勁爆演繹大獎由李克勤《失魂記》，克勤同時獲頒勁爆播放指數及勁爆年度歌手，3獎在手嘅佢話：「其實幾欣賞以前頒百幾個獎時，我覺得幾好，歌手有順風順水同唔順風順水嘅時候，當無人問津時，喺年尾都有獎，我曾經深深感受過嗰份雪中送炭。o依家最好係26號唔使頒獎，歌手搵食㗎嘛！要旅行、放假、搵食同湊仔。」博得全場掌聲，之後佢唱出《C3PO》同《失魂記》。
2322：勁爆男歌手獎項頒發俾周柏豪、許廷鏗及陳柏宇，勁爆專輯獎落喺側田《The Drug Called Music》手上。
2310：勁爆女歌手奬由王菀之、鄭欣宜、衛蘭奪得，王菀之感謝父母俾咗好多學習音樂嘅機會自己，所以把握機會全心全意去做好音樂，欣宜話覺得係「我好不敢當嘅一件事」，而Janice多謝歌迷體諒。
2255：勁爆合唱歌由吳業坤同王灝兒嘅《原來只因深愛著》，李克勤同6號@RubberBand嘅《黑膠》，講感受時吳業坤話：「我要多謝兩間公司嘅合作，可惜JW唔喺度，如果喺度就可以攬吓佢。」隔離嘅克勤即刻話「喺度咩，冇嚟啫。」坤哥再話：「咁我攬攬你啦克勤哥。」克勤講感言嘅時候就話多謝填詞嘅梁栢堅，估唔到平時寫開寫咸濕歌嘅佢可以寫到啲咁好嘅歌詞。
2245：勁爆組合由C AllStar同Super Girls奪得，Super Girls演出時就指成員Aka不適，先後落台，剩低4人演出。
2240：大會頒發勁爆唱作人獎，由側田、王菀之及林奕匡奪得，側田同王菀之一見面即攬攬，其後側田講感言時話：「見到Ivana（王菀之）同Janice（衛蘭）有啲感觸，因為十幾年前我哋都係一齊出席頒獎禮。」被王菀之叫佢唔好感觸，要感動，但側田再講：「希望十幾年後，我哋變晒老太爺同老太婆都可以再一齊嚟頒吓獎。」王菀之即發嬌嗔話：「哎呀我係女仔嚟㗎！」而林奕匡就話側田同王菀之係佢好敬佩嘅人，可以同台攞獎好開心。
2233：第10首勁爆歌曲由側田嘅《不經不覺》奪得，佢一上台就攬實啤梨，佢話如果首得獎歌喺10年前唱唔到，因為自己冇經歷，但佢想同年輕人講，低潮係會過嘅，慢慢享受；開心嘅時候亦都唔好驕傲。
2227：第9首勁爆歌曲由C AllStar憑《一刻戀上》奪得，4子上台領獎，佢哋除咗多謝fans同唱片公司人員外，釗峰仲話要多謝隊友，仲話：「要珍惜每個同你哋一齊參加嘅頒獎禮。」
2222：欣宜演出後，司儀要求佢留喺台上，頒發第8首勁爆歌曲，欣宜一睇名單就大叫：「哎呀，我識佢㗎！」之後就宣佈由許廷鏗嘅《神奇之旅》攞獎，欣宜頒獎俾佢時話：「恭喜你呀！」但許廷鏗就話：「喺佢你手上攞到獎感覺好奇怪……」
2216：欣宜憑《你是什麼時候開始不愛我的》奪得第7首勁爆歌曲，行動不便嘅佢由許廷鏗扶上台，佢一上台就攬攬同錫錫家燕姐，家燕姐話自己好開心，仲話：「I'm proud of you, Joyce!」欣宜話自己第一年以indie歌手嚟攞獎。
2212：杜德偉攞勁爆國語力歌手，及憑《妳在我的愛情裡》攞勁爆國語力歌曲，佢拍片答謝，話遺憾唔可以嚟到現場攞獎，但未講完條片cut咗。
2208：石詠莉因為舉行婚宴缺席，大會預告搵佢錄咗條片，石詠莉多謝大會同唱片公司等，佢話希望下年會做多啲原創音樂送俾所有人。
2158：薛家燕出場，頒發十二樂勢力獎項，得獎者分別有：Fabel、羅啟聰、JUDE、葉巧琳、布志綸、J. Arie、許靖韻、鄧小巧、陳明憙、ReVe、Merry Lamb Lamb、石詠莉。布志綸攞獎時以「我係Mr.嘅主音」作自我介紹，而佢嘅多謝名單中不忘感謝Mr.嘅隊友。
2150：坤哥唱完《傷心到變形》後，大會留佢喺台上，頒發勁爆作曲獎俾佢同Cousin Fung，坤哥笑言：「估唔到有今日」，Cousin Fung孭住個背囊上台，仲叫MC啤梨幫手度吓自己個袋夠唔夠佢袋個獎返屋企，坤哥叫對手幫手袋埋個獎走。
2135：頒發勁爆躍進歌手，由鍾舒漫、洪卓立、小肥、黎曉陽、吳業坤奪得，其中洪卓立講感言時話：「今年最躍進嘅地方係做咗一隻唔係好理大家感受嘅《帶著骨灰去旅行》，同埋露咗我嘅私處——額頭俾大家睇，希望大家會鍾意。」
2129：第6首勁爆歌曲：鍾舒漫《小碎步》，鍾舒漫喺台上演唱得獎歌曲時，大會直播鏡頭數度拍台下嘉賓反應，見到鍾舒漫舊愛吳浩康專心睇表演，反而係佢身旁嘅J. Arie睇到手舞足蹈，另外亦有其他歌手邊點頭打拍手邊聽歌。
2122：第5首勁爆歌曲：王菀之《突然一生人》
2120：勁爆監製由周柏豪嘅《天網》奪得，但該曲監製何哲圖及周錫漢缺席頒獎禮，由代表領獎，接住大會隨即宣佈第4首勁爆歌曲由《天網》奪得，周柏豪上台致謝時話：「實今年冇乜期望，好幸運還個好角色，多謝樂少鋒、徐天堂。」又多謝現時所屬及舊唱片公司。
2110：到頒獎幕後獎項，勁爆填詞獎由農夫嘅《返工咁辛苦為咩》，不過佢哋缺席，由代表領獎。Dear Jane憑《也許我不會活多一歲》獲勁爆編曲，Howie做代表講謝詞：「其實好surprise，我哋係樂隊成員，唔係專業音樂人，我哋致力每首歌都有自己特色，」喺樂隊set嘢做表演期間，主音Tim被問到有冇說話同身在加拿大嘅太太楊洛婷同囡囡Tanya講，佢搞笑咁表示：「老婆o依家都聽緊，好快嚟搵你㗎喇！」然後啲樂器又出咗少少問題，幸好演出時回復到。
2050：勁爆獨立音樂人/樂隊獎，分別由黃意雅、Serrini、ToNick奪得，ToNick非常多謝陪佢哋成長嘅戰友，好似Supper Moment咁，又多謝大家鞭策同扶助佢哋，佢哋特別多謝帶佢哋入行嘅趙增熹。
2030：一班2017年嘅新人一齊上台，為頒發勁爆新人獎項，由王嘉儀、秦馨敏、顏卓靈奪得。
2020：第三首新城勁爆歌曲：《較早前錄影》吳浩康
2015：第二首新城勁爆歌曲：《天敵》衛蘭
2010：第一首新城勁爆歌曲：《霸氣情歌》陳柏宇
2007：新城勁爆卓越表現歌手由陳柏宇同衛蘭奪得
