伍詠薇一向大膽敢言，噚晚在銅鑼灣出席女性分享活動談論性愛，現場推廣一件女性性玩具，伍姑娘同性治療師何慕詩對談，講到點樣爭取自己嘅性福？伍姑娘話：「有啲怕醜，但對性話題唔需要忌諱，係正常需要，和諧性生活同美滿婚姻係掛鉤，係生活嘅一部分，有正常嘅性生活人都光彩啲喇！」
講到性關係有時會悶，點睇性玩具，有冇淫蕩感覺？伍姑娘話：「細個時候係咁諗，性玩具係點玩㗎，仲會裝啲水落condom到，掟水彈。我覺得最重要係搵到自己喜歡嘅產品同埋健康。」
係咪成日同身邊姐妹分享性經驗？伍姑娘話：「十幾歲少女時代對性好好奇，講到欲言又止，o依家講到40、50歲依然都係講到一截截。」伍姑娘平時言行出眾，但佢否認喺姊妹群中最大膽講性嘅一位，又話：「其實我好陰功，生得個樣大膽，討論下又唔會死，係一種學習，唔識會少咗好多樂趣，有病又唔知道，o依家都有性教育啦，唔使忌諱。」
年屆48歲嘅伍姑娘坦蕩蕩承認同老公練海棠性生活好愉快好健康，仲話：「你睇我keep得幾好，o依家92歲(自稱)一啲都dry，未結婚同居都有性生活，我覺得呢樣嘢係散發安多薰好charm，要keep住，就好似食飯一樣，唔好避忌。」伍姑娘話有咩都會同老公講，又講笑話仲會同埋人哋老公講。
伍姑娘坦承同老公會大膽談性，夫妻生活除咗旅行同食飯正常男女都要分享呢樣嘢。身邊好友有冇呢啲問題？伍姑娘話：「冇問當愉快，冇輸就當贏，我身邊啲朋友都已經結咗婚做咗媽咪，男女都好健康，一啲都唔dry呀，你哋自己可以check下，不過我人生就嘆夠喇，未結婚前已經好多男朋友。」
 攝影：陳慧安 |  伍姑娘話身邊啲朋友一啲都唔dry。 |  伍姑娘同性治療師何慕詩齊齊講性話題。 |
 |  伍姑娘自爆同老公性生活愉快。(微博圖片) |
