「嗰個男人唔好俾我見到佢呀！嗰個賤郎，我見到佢都憎！」正爸青筋又現晒。
日頭唔好講人，跟住Nic就出場，捧埋個蛋糕上台，「係係係，係我黃生，係我錯，我特登買咗個蛋糕，俾以愛，係佢生日。」正爸阻住唔俾Nic行近：「唔好埋嚟唔好埋嚟！我一見到你就火滾喇！」正媽一聽就嬲，鬧以愛：「原來你仲有同佢來往嘅！」Daphne呢個時候就衝出嚟，高八度鬧佢：「我都唔想見到你呢個賤女人呀！」一手搶過蛋糕就躓落以愛塊面……成面cream嘅以愛呆若木雞。
正爸不堪愛女受辱，一杯奶茶就淋落Nic度，大鬧：「你咁樣搞我個女！你仆街啦！」
如果你冇睇開《溏心3》，都應該估到邊個打邊個嘅。今日一眾演員出席劇集宣傳活動，重演番嗰幾場經典場面咁啦，除咗陳敏之被掟蛋糕，唐文龍被潑奶茶，仲有陳敏之被李司棋作勢怒摑：「你係咪無男人唔過得世？你去做雞啦！我要打死你，人哋做雞為搵錢生活，你為咩呀？點解你咁賤呀？個男人唔要你喇！」嗚…
胡琳向陳敏之掟完蛋糕、做完晒場戲，即急急向陳敏之遞紙巾替佢抹面，最後大會仲向陳敏之送上真正蛋糕，預祝佢生日。
表面上一切好似好有部署，其實又唔係。被躓蛋糕嘅陳敏之事前只係知大會為佢預備咗個Cake預祝生日，唔知原來仲有另一個用嚟躓佢…
陳敏之事後受訪謂被躓蛋糕嗰陣冇嬲，只係呆咗，仲話：「大家開心就好，我反而覺得唐文龍被潑奶茶仲慘。」至於俾正媽李司棋兜巴星，陳敏之話埋位前已經請司棋姐真打，一次打兩巴就完成，老公仲讚佢演得好。
咁老公有冇睇陳敏之同唐文龍床戰？之前有報道話老公派嬲喎，敏之就話老公冇睇到嗰啲場面……
係咪真係嬲呀…
 |  正媽又兜巴星以愛 |  |
 究竟係摸佢、定兜緊佢呢？ |  此時唐文龍拎住個蛋糕道歉 |  胡琳衝咗出嚟 |
 一嘢躓落聲稱事前不知情嘅敏之臉上 |  |  |
 正爸還拖，又鬧唐文龍「仆街」兼潑奶茶。 |  |  |
 呢個蛋糕，係真係為敏之預祝生日嘅。 |  胡琳亦遞上紙巾俾敏之抹面 |  無限loop… (《溏心風暴3》影片截圖) |
 (《溏心風暴3》影片截圖) |  (《溏心風暴3》影片截圖) |  (《溏心風暴3》影片截圖) |
 (《溏心風暴3》影片截圖) |  (《溏心風暴3》影片截圖) |
