67歲嘅徐少強喺70年代演過唔少大俠角色，當年「大俠」型象深入民心，佢仲由電影圈打入電視，代表作仲有《三少爺的劍》、《天蠶變》等等，其中《天蠶變》入面雲飛揚一角尤其著名。


而徐少強嘅感情生活亦相當精彩，徐少強喺早年曾經有第一任妻子，二人育有一子徐亦東，而佢亦係創作人，活躍於廣告及電影業。


不過講到徐少強較廣為人知嘅一段情，相信就係佢同雪梨嘅一段「婚姻」，徐少強同雪梨喺82年拍《養鬼》時認識，而喺翌年雪梨仲為徐少強誕下大仔徐偉棟，87年再誕下次女徐頴堃，不過唔夠1年二人喺88年分手。大部分人以為雪梨當年同徐少強離婚，但其實佢哋根本冇結過婚，雪梨喺2015年曾經接受訪問透露，當年生完仔後，徐少強曾經應承註冊結婚，不過簽紙當日，徐少強「忘記」帶同前妻之離婚證明書，最後不了了之。


而喺九十年代晚期，徐少強返大陸發展，而佢亦喺十幾年前再娶一名細自己30年嘅嫩妻，仲生咗一仔一女。





雪梨同徐少強當年熱戀生子，但原來一直未婚。（資料圖片）雪梨為徐少強先誕下囝囝徐偉棟
眨吓眼，徐偉棟同徐頴堃都已經長大。徐頴堃參加過「2012國際中華小姐競選」（資料圖片）