仲有一日，就係《萬千星輝頒獎典禮2017》舉行嘅日子，大家都期待究竟邊個係視帝同視后，唔少網民全力撐《降魔的》嘅馬國明同《不懂撒嬌的女人》嘅宣萱！
除咗呢個獎之外，其他獎項都一樣有人談論，好似入咗行好多年，曾經提名過好多次「飛躍進步男藝員」，15年嗰陣已經喺大馬嘅頒獎禮已經拎過飛躍進步男藝員嘅楊明，今年竟然又有份提名「飛躍進步男藝員」，搞到楊明喺記者會拉票嘅時候，勁尷尬咁自稱做「老屎忽」兼話：「咁多年都係飛躍男藝員，我都一把年紀，不過都好開心，證明公司覺得我仲好後生，仲有進步嘅空間。」(新聞連結：http://bit.ly/2EmXV9X)
雖然有網民都覺得楊明自從喺2015年《收規華》做第二男主角之後，大家都見到佢有進步，之後又喺擔正拍新劇《抱擁情人》，最近又同王浩信拍《兄弟》，俾佢拎呢個獎，點都係一個鼓勵，但係獎項呢啲嘢，又存在好多不明朗嘅因素，所以有傳呢個獎會俾胡鴻鈞！
今次胡鴻鈞分別喺台慶劇《降魔的》同《誇世代》做咗兩個唔同嘅角色，一個係扮精靈，一個係扮敗家兼專玩變態嘅二世祖，雖然演技仲有好大嘅進步空間，不過一個歌手走去拍戲，已經可以接受，最最最重要嘅係，胡鴻鈞從內到外都比楊明得寵！
至於飛躍進步女藝員方面，就有消息話係第三次獲提名朱晨麗，朱晨麗噚日接受傳媒訪問就話：「無論拎唔拎到獎，我都會繼續努力拍好啲作品俾大家！」
