森美同麥美恩今日到銅鑼灣為一日本食店任開幕嘉賓，森美話食店想搵個靚女一齊參與，於是搵咗麥美恩，呢頭帶挈拍檔，嗰頭就勁踩對方，森美話：「留意到麥美恩近日IG post相好有女神feel，佢想跳出村姑變女神，但我睇留言都可以嘔。」又笑對方啲衫愈來愈低胸，今日好有lady in red 返去八十年代感覺，擺明嘲笑佢。麥美恩話：「你梗係啦，平時鍾意劉心悠bb、周慧敏。」
森美五月會再帶團去東京，正在搵拍檔同行，麥美恩自薦，仲話可以同森美玉帛相見，森美再踩對方話：「有得揀都唔揀麥美恩啦，佢又冇著數畀到，我懷疑我身材好過佢，上圍嚟計一定勁過佢，玉帛相見我好蝕底，對上一次係同高Ling、心穎浸溫泉，你用毛巾遮住個樣，我去去浸男溫泉啦。」
被狠狠狼批之下，麥美恩終於反擊：「唔好睇小村姑，我有好多兵架。」森美即刻抵死話：「咩兵呀？波籮冰、橙汁冰呀？」麥美恩先至話係觀音兵。
 攝影：陳俊強 |  森美同麥美恩今日到銅鑼灣為一日本食店任開幕嘉賓。 |  森美 |
 麥美恩 |
