張家輝自導自編自演嘅新戲《低壓槽》，噚晚喺九龍灣國際展貿中心舉行首映。陳慧琳（Kelly）特登撐場，身穿透視裝大騷長腿嘅佢仲著咗對毛毛高踭鞋，記者笑到佢若隱若現好性感，Kelly話：「夏天吖嘛，都冇乜嘢睇啦，其實我今日係想突出對鞋，家輝仲問我『做乜帶兩隻狗嚟』。」
咁夜都出席撐場，Kelly笑言冇得幫兩個仔做功課，另外今次係張家輝執導嘅另一新作，問到Kelly同張導演有冇合作嘅機會，會唔會想度身訂造一部電影俾你？Kelly話：「其實上一套《陀地驅魔人》我都有客串，度身訂造緊係好啦，不過我驚佢設計嘅角色我唔識做，啱啱聽佢哋講佢哋個個角色都係奸角，不過我都想演奸角，夠好玩。」
講到黎明最近做咗爸爸，問到Kelly有冇見過BB相？佢話：「冇喎，我唔會咁八卦嘅，不過我個心都想睇，但係我就唔會特登問佢拎嚟睇，有機會撞到先會問佢。BB一定係可愛㗎喇。」
有冇啲育兒心得可以分享下俾黎明？Kelly話：「其實佢要有心理準備會有好多人影佢，好似上次喺醫院咁，我都好明白佢嘅心情，因為當時我生第一個嘅時候好多傳媒都喺醫院，包圍晒成間醫院咁。」
Kelly仲話當時喺醫院感覺好似抖唔到氣：「可能係因為我第一次生啦，其實小朋友遲早都要返學，你保護得佢幾多吖，所以自己要調節個心理，有一日就會接受到，好似我依家兩個仔返學咁，就算冇記者都會有家長去影，放落啲社交平台嗰到傳媒又會拎嚟登，所以自己一定要調適，唔好唔開心。」
 攝影：仇志德 |  陳慧琳（Kelly）噚日特登嚟幫張家輝撐場。 |  身穿透視裝大騷長腿嘅佢，仲著咗對毛毛高踭鞋。 |
 今晚咁夜都出席撐場，Kelly笑言冇得幫兩個仔做功課。 |  講到黎明最近做咗爸爸，Kelly話：「其實佢要有心理準備會有好多人影佢。」 |  |
