林奕匡(Phil)今日喺擔任灣仔一個嘉年華表演兼抽獎嘉賓，活動一開始已經有Fans上前送小禮物，阿Phil獻唱中途更落台同觀眾握手。
噚晚聖誕節正日，阿Phil同一班好友聚會慶祝聖誕，更一嘗多年未試過嘅切火雞儀式，好友之間定下規則要買價值三百蚊嘅禮物作抽獎，佢苦笑話：「我抽到份最差禮物，份禮物由兩份嘢組成，其中一樣我有，另一樣我有代言用唔到。」
愛妻號嘅阿Phil冇特別送聖誕禮物畀太太，佢話：「之前佢睇中個手袋，點知佢自己買咗，之後佢見到對好靚嘅鞋，我就送咗畀佢。」今年聖誕佢亦化身成為公司嘅聖誕老人，喺聖誕前夕為同事送上每人一隻智能手錶，佢話：「我之前冇諗到送乜，想約大家食飯又未必夾到時間，其實佢哋唔單只係同事，仲係好朋友，零晨兩點幾仍然會覆你工作嘅嘢。」上年佢就揀咗澳洲嘅祝福銀幣送畀身邊朋友。
 林奕匡(Phil)今日喺擔任灣仔一個嘉年華表演兼抽獎嘉賓。 |  噚晚聖誕節正日，阿Phil同一班好友聚會慶祝聖誕。 |  今年聖誕佢亦化身成為公司嘅聖誕老人，喺聖誕前夕為同事送上每人一隻智能手錶。 |
 佢話：「其實佢哋唔單只係同事，仲係好朋友。」 |
