韓國人氣組合東方神起、Super Junior（SJ）、少女時代（少時）所屬嘅SM事務所，今日宣佈已完成對Keyeast事務所嘅收購，Keyeast老闆裴勇俊亦加入SM，成為SM嘅股東。
是次SM購入Keyeast大股東裴勇俊嘅股份，裴勇俊亦於是次收購中購入SM嘅股份，成為SM嘅主要股東。SM表示，是次收購後，Keyeast原有嘅明星、韓流傳媒、演出等業務，將跟SM多年積累嘅經驗結合，得到更進一步嘅發展。
Keyeast旗下藝人包括神劇《來自星星的你》男星金秀賢、韓片《與神同行》男星朱智勛、《魔女的法庭》女星鄭麗媛等當紅藝人，今次SM收購Keyeast，令一眾當紅演員，跟人氣組合SJ、少時等歌手成為同門，粉絲都非常期待之後一眾演員及歌手會有咩合作計劃。
另外，SM今日亦宣佈已完成對FNC事務所旗下上市子公司FNC Add Culture嘅收購，SM跟FNC娛樂成為合作關係，今後兩家公司將製作更多互聯網及手機嘅娛樂內容，攜手進軍海外市場。
