(大公開) 揭開iBanker工作的~神秘面紗
(大公開) 揭開iBank工作的~神秘面紗
當你聽到別人在投行工作，心中可能葡萄不已。iBanker的確是不少同學仔的Dream Job。大學生心中的投行，跟現實中的有何差別？在投行打滾近20年的資深金融風險專家鄔思彥(Dominic)分享當中生涯，揭開行內工作的神秘面紗。想入行的同學，就看你夠不夠硬淨。
中大系統工程二年級生Stanley稱，「喺投行做嘢，壓力爆煲，絕對會短幾年命！據我了解，前線員工每周要做70至110個鐘，分析員要整Model、執Excel，又成日改，周六、日做到凌晨唔出奇。」
鄔思彥指，「我唔鍾意太進取嘅工作環境。」各投行文化不同，不同部門對員工的性格要求亦有分別。他坦言，投行前線員工通常Work Hard，Play Hard，要承受巨大工作壓力，且沒有穩定收入。
曾在瑞銀實習的應屆畢業生蔡詠琳(Natalie)指，「公司重視生活平衡，我做過衍生工具交易支援部門，同事每日平均番8至9個鐘。」大茶飯日子不復再，在投行工作的人，是否約35歲便可賺夠退休？
Stanley稱，「得嘅！做前線，我估年薪有百萬元，咁做十幾年，都有千幾萬元，夠買樓退休！」
鄔思彥則表示未必可以這樣。「金融界風光日子已經過咗，以前投行試過出3年花紅畀員工，但依家金融市場愈成熟，競爭就愈激烈，生意成本增加，監管又嚴咗，都見到投行股本回報率一路收窄緊，員工福利亦減少。」惟鄔思彥享受工作，「我鍾意我嘅工作，已將工作融入生活，不時在晚上也會進行視訊會議。」
港大經濟及金融學系三年級生趙世傑(Terry)指：「入到嘅話，前途應唔錯！我會想跟住個階梯晉升。」惟鄔思彥指，「我做過好多間金融機構及投行，美、英、荷、日資都做過，轉工係因見到有新嘅學習機會。同4大會計師行唔同，要喺金融界升做主管級可能要4至5年，做得好之餘，仲要睇有無空缺。」
他稱，投行前線員工，如交易員流失率高，「我見證過喺6年間，同一張交易台，有十幾人轉換！若公司搵唔到錢，前線員工都幾危！」
鄔思彥鼓勵畢業生思考時局，且要有前瞻性，「諗嚇5年、10年後，經濟周期會點，到時需要啲咩人。」他稱，人要適應環境，「唔好話之前做開交易員，就要搵番交易員嘅工。交易自動化、客人自己落盤，已是趨勢。」他續說，金融業仕途是由自己搭建，「一畢業要盡快喺頭3年考曬所有試，因之後升咗職，工作會好睏身。第4年就可諗進修。做夠10年，就要放多啲時間建立人際網絡。」
Terry認為：「夠年輕，往往畀人個感覺係好Fresh、好有熱誠。年輕同聰明之外，仲要睇你對市場嘅認識，以及你嘅性格、待人接物等。」鄔思彥則有不同看法，指某投行部門未必愛生力軍，「我做嘅風險管理部門，會比較睇重工作經驗同年資，若你捱過唔同嘅經濟周期、股災等，受聘嘅機會會大啲，你畀嘅意見亦會更專業。前線就不同，鍾意請後生，佢哋捱得！」Natalie觀察到，在投行工作的同事都非常主動、聰明、且效率高！
鄔思彥補充，金融業也著重群體工作，「傳波比射波更重要！唔係最叻、最勤力就做得最好，反而識幫同事達成目標仲緊要。」在金融業，受經濟周期起落影響，公司前景有很多未知數，不管你如何能幹，也有被裁的危機，他指，「公司重組好平常，一係畀人買，一係執笠，就算被裁走，也不應妄自菲薄。做前線嘅，若公司搵唔到錢，都有機會被人炒。」
Stanley稱，「投行應有唔錯晉升機會，就算之後轉出嚟，都有好多選擇，如對沖基金、私募基金及顧問公司等。」鄔思彥也認同，「唔係金融機構先搞金融，大企業也可搞金融，如供應鏈金融。依家入去大企業嘅金融或投資部門做，機會可能比金融機構仲多，佢哋大多有行業壟斷優勢，若要求供應商用其融資服務，就相對容易！愈來愈多大企業自己發債、融資，金融機構嘅角色或變得可有可無。」
金融人可先投身非金融機構，鄔思彥指，「若喺金融機構分析某行業板塊，始終係門外漢睇門內嘢，所以先入某實業公司打滾，對嗰行有咗深入了解，之後跳入金融機構做番嗰行嘅分析，都幾吃香！」
source: daliulian.net
