說小妹住九龍西，可以選擇既人有好多。
但小妹最後投左黃毓民 + 梁耀忠。
超區票投梁耀忠其實不難理解，因為我覺得佢真係有心做野既。
亦都辛苦曬佢，畢竟佢都已經唔年輕…仲要對住咁多牛鬼蛇神。
至於票王，我感激亦都多謝佢做過唔少支持動物權益既行為。
但係…佢未至於令我會覺得佢有能力同建制派抗衡。佢俾我感覺似係KOL多於佢係一個做實事既議員。
好多朋友問我點解要投黃毓民，話佢已經變左Blablabla..
.其實投票唔係要投一個你覺得有能力可以代表你既議員嗎?我覺得只有佢可以代表我喎!
試問當代有邊位議員有能力可以寫到9XX條修正事項，有做功課唔訓覺但又言之有物、擲地有聲?
其實我諗左好耐，到底應該投黃毓民定係 毛孟靜 (事實上我有朝早9點一路諗到夜晚9點)。
唔係毛孟靜唔好，我同樣好鍾意佢。我覺得佢好有學識，亦都可以好一針見血咁提出問題。
只係由於有 雷動聲吶 既出現，所以呢票…最後我係投左俾黃毓民。
因為我知道毛孟靜係一定可以夠票入立法會。
但黃毓民唔一定，因為太多人講 一票不投熱普城。
我無認真研究過"雷動"，我只係睇左九龍西 + 極速望過下佢地支持邊個。
感覺上似係要新人棄舊人咁…我好想請問點解九西要保另外個兩個?
無特別研究過老師，但我知佢選前發生左某D問題既…而且佢俾我感覺好奇怪…
另外個位，上次我無份投 (就算有得投亦都無得揀)。但我睇過某D訪問，我唔覺得佢特別有料到。
就算有人話佢係政冶花瓶，佢都只係答人佢會努力塞爆呢個花瓶…
出黎返工你都唔可以講邊做邊學啦，更何況係呢類咁重要既公職? 請問該政黨背景究竟確認左未?
其實我投票揀人好簡單，就係要投一個有腦有能力既反建制派議員入到立法會，發揮佢地所長去守護我地既香港!
至於佢係熱普城定係泛民又或者公民黨等等，呢d 根本唔重要。
最重要既係做到野呀~我明白政黨一定需要新舊交替，
但可唔可以唔好個個趕住要趁後生乜都唔識咁入去呢?
立法會係需要有腦既人去幫普羅大眾爭取應有既野而唔係堆一班乜都唔識既人入去慢慢學。
我地已經無乜時間去同個政府抗爭，唔好浪費大家時間得唔得?
以呢幾日佢地既所作所為，我覺得今屇應該可以打定輸數先~
好記得唔知邊位作家(好似係健吾)有講過一句令我印象好深既說話:
正常外國係候選人睇民調做事，點解香港會係選民睇民調去決定投票俾邊個?
有朋友同我講"雷動"係一個stat，有stat做reference會好d。但我深信好多投票既人係諗都唔諗就跟個stat投。
但香港人精神，係做乜都一窩蜂架嘛…
引用返幾句我係Whatsapp 同我朋友既對話:【每個選民都應該有自由意志，唔係話配票就連腦都唔用咁去投落去】
【政冶取向於我而言，好等同宗教取向。每個人都有每個人既自由。
如果取向唔同，咪講少d 囉…(前提係你好愛你朋友，而你朋友唔係盲目支持另一方的)。你既然唔會選擇宗教逼害，又何必要政治逼害其他人?】
我真係有朋友講明投田北辰，佢有用過腦去分析點解佢要揀田生…咁我會尊重佢…
最後，亦都係最重要既一句:【和諧唔係一百個人講同一說話，和諧係一百個人有一百句唔同說話之餘，又互相尊重…】#天與地
P.S: 今屇反建制既新人我只睇好 羅冠聰 同 楊岳橋。希望你地唔會令我失望…
