艾嘉、劉兆銘、林嘉欣同曾國祥等噚晚到中環出席「2017年Montblance藝術贊助人大獎26週年慶典」，張艾嘉仲獲大會頒發「2017年萬寶龍藝術贊助人大獎」，同時喺現場嘅展覽入面，仲展出張艾嘉手寫嘅劇本《相愛相親》初稿。張艾嘉受訪時表示覺得開心同榮幸：「令我有機會重新思考寫作，因為我習慣手寫稿，所以更加珍惜寫作嘅快樂同熱誠。」
講到寫作靈感，佢話暫時未有新靈感，因為有新片即將上映要做宣傳，同時有舞台劇同三個劇本改寫緊，所以要停一停，張艾嘉話：「嗰三個劇本係嚟自新導演同好朋友，本來想我畀意見，傾傾吓變咗自己寫。」
至於同老公袁劍偉一齊現身嘅林嘉欣，佢話為咗支持張艾嘉，特地同老公提早從台北返港，嘉欣話從未同張艾嘉合作過，好希望有機會一試：「不過佢一向親自寫劇本，所以要視乎角色啱唔啱。」而老公明年亦會開拍新戲，不過嘉欣話唔會參演：「我經常都鼓勵佢要同唔同類型演員合作，因為拍我太容易，我哋已經好有默契。」
另外，日前被陳瀅口快快爆出同女友王敏奕年尾結婚，單拖現身嘅曾國祥就否認：「當日喺Party內有朋友生日，亦有人啱啱結婚同生小朋友，所以陳瀅搞錯咗啲人物。」曾國祥保證如果有結婚計劃一定會大家分享。
嚟緊11月8號生日嘅佢話，碰啱要到上海工作，今年都唔會特別慶祝，提到王敏奕早前同曾合作拍劇嘅黃宗澤(Bosco)傳緋聞，仲被影到喺同一餐廳前後走，佢話：「Bosco對女友好好，因為第一次拍攝劇，Bosco教佢好多，報導咁樣寫都有啲唔好意思，以我所知當日佢哋唔係一齊食飯。」
 張艾嘉獲大會頒發「2017年萬寶龍藝術贊助人大獎」。 |  劉兆銘亦有出席活動。 |  林嘉欣同老公特登提早返港支持張艾嘉。 |
 林嘉欣老公袁劍偉 |  曾國祥否認同王敏奕結婚。 |
