吳鎮宇噚晚到天際100出席福斯傳媒集團嘅發佈會，鎮宇話最近大陸香港兩邊忙，問聖誕有冇時間陪囝囝Feynman？佢表示：「唔知呀，都有電影要去第二度拍。佢喺屋企功課都好忙，都希望有時間陪到佢。」問到囝囝拍完大陸真人騷節目《爸爸去哪兒》後，有冇仲想拍戲？鎮宇話：「咁又冇，冇乜必要都算啦，不過主要係冇人搵，要等佢放暑假先得，唔可以告假，最緊要過媽咪嗰關，唔係好關我事。」

問到囝囝係咪知你做嘢辛苦？鎮宇話：「佢明㗎，見到我喺片場好嚴肅好大壓力，平時喺屋企會同佢玩。」知你咁辛苦，有冇幫你揼骨？佢扮嘆氣：「冇呀，佢專恰我，人哋買嘢嚟食，好似點心、意大利粉、午餐肉，都畀佢食晒，o依家佢肥到唔見咗條頸，應該可以參加英雄聯盟裏面做屎撈人，佢之前玩手機縮條頸入去，要搵骨科抆番條頸出嚟，不過佢好識養生，知道咳唔可以飲凍嘢，將汽水攞出嚟攤暖，發現畀我哋飲咗就話我哋。」

更多娛聞，喺晒《娛果》
http://fb.com/appledailyent

攝影：沈健程吳鎮宇話囝囝都係學業為先，唔會請假拍嘢。張可頤
邵仲衡惠英紅崔碧珈
吳鎮宇笑囝囝o依家肥到似屎撈人。(微博圖片)