馬天佑（Mayao）雖然係形象設計師，但一直喜歡音樂嘅佢，從來都冇放棄過唱歌，而人緣唔錯嘅佢，多年嚟身邊都有唔同嘅人出現，幫佢圓夢，好似佢曾經同阿Sa(蔡卓妍)合唱國語歌《親愛的你好嗎》，鄭秀文又幫過佢做MV女主角，黎明仲落場幫佢做MV導演添！
至於，佢啱啱派台無耐嘅新歌《紅線》，就揾咗就嚟緊會舉行演唱會嘅盧巧音（Candy）合唱，之前仲一齊拍MV，Mayao接受《蘋果》訪問話：「仲有一件開心事，就係今次嘅MV，揾到殿堂級設計師陳幼堅幫我做導演，佢之前未做過MV導演嘅，今次動用咗佢嘅團隊幫我做，好開心。」
講到同Candy合作，Mayao話之前大家唔相識，但佢一直好欣賞對方，好想有機會合作，估唔到夢想成真：「因為好想揾一個好似邱比特咁嘅人合作，Candy曾經唱過《三角誌》、《垃圾》同《好心分手》，我覺得佢已經昇華到呢個層次，揾佢合作係最啱。」
Mayao又透露，今次呢個project係會做一系列以愛情故事為題材嘅合唱歌，同Candy呢首《紅線》係第一首，之後仲會同唔同人合作，咁依家就當然唔講得啦！
 |
| 仲搵咗殿堂級設計師陳幼堅(右)幫佢做mv導演 |  |
