全城注目手機iPhone X日前正式推出，本來唔少炒家諗住可以賺返筆，點知聽講大陸嘅貨源充足，於是乎「炒價不似預期」，搞到唔少果農，燶貨收場！
不過對於一班用家嚟講梗係好事啦，可以極速換新機喇！好似產後復出嘅Jinny吳若希，前日有《蘋果》讀者透過「爆相爆片」喺旺角先達捕獲Jinny，讀者黃先生話：「大約夜晚7點左右，吳若希同埋一個女人入咗商場，嗰陣都有好多人望住佢，不過佢都冇乜點理，繼續周圍行，佢哋先後行咗入去三間舖頭格價。」
身為精明嘅消費者格完價，唔知Jinny有冇真係入番部呢？黃先生就話：「咁又冇喎，但係佢問完價錢之後，打咗個電話同人匯報，仲聽到佢話iPhone X要11,000蚊，不過過咗5分鐘左右，佢同埋個女人走咗，最後梗係冇買到電話啦。」
唔知吳若希係諗住買嚟同老公Alex一人一部用情侶機，抑或係送俾老闆何哲圖（Herman）呢？喺黃先生影到嘅嗰晚，吳若希喺Instagram貼咗圖，原來佢哋嗰晚成個星夢團隊，為11月生日嘅同事慶祝生日，好似有Herman、鄭俊弘、何雁詩、周柏豪同HANA菊梓喬等等，搞到吳若希留言話：「一間公司食飯，有一半人都是天蠍座的寶寶，你叫其他星座的人情何以堪？」似乎買唔到新機一啲都影響唔到佢心情。
