မိုးညှင်း - နိုဝင်ဘာ ၉
ကချင်ပြည်နယ် မိုးညှင်းမြို့နယ် နန်းမားရဲစခန်းပိုင် နယ်မြေ တွင် တရားမဝင်လက်နက်များ ကိုင်ဆောင်၍ မူးယစ်ဆေးဝါး များ ရောင်းချ၊ သုံးစွဲသူ ၂၈ ဦး ဖမ်းဆီးရမိခဲ့ကြောင်း သိရသည်။
ဖြစ်စဉ်မှာ နိုဝင်ဘာ ၉ ရက် နံနက် ၇ နာရီက မိုးညှင်း မြို့နယ် နန်းမားရဲစခန်းပိုင် နန့်စွန်းတောင်တန်း လဆန်ရွာပျက် လဆန်တောင်ခြေနေရာတွင် နန်းမားကျေးရွာ ရန်အောင် ရပ်ကွက်နေ ထွန်းထွန်း(ခ) အောင်ဝင်းထွန်းနှင့်အဖွဲ့သည် တရားမဝင် လက်နက်များ ကိုင်ဆောင်၍ မူးယစ်ဆေးဝါး များ ရောင်းချနေကြောင်း သတင်းအရ နယ်မြေခံတပ်များ၊ မိုးညှင်းခရိုင် ရဲတပ်ဖွဲ့မှူး ဒုရဲမှူးကြီး သောင်းလင်းနှင့်အဖွဲ့များ ပါဝင်သော ပူးပေါင်းအဖွဲ့တို့က ရှာဖွေဖမ်းဆီးခဲ့သည်။
ထိုသို့ ဖမ်းဆီးစဉ် အဆိုပါနေရာသို့ မူးယစ်ဆေးဝါး သုံးစွဲရန် ရောက်ရှိနေသော အမျိုးသား ၂၈ ဦးအား ဖမ်းဆီးရမိ ခဲ့သော်လည်း ထွန်းထွန်း(ခ)အောင်ဝင်းထွန်းမှာ ထွက်ပြေး လွတ်မြောက်သွားကြောင်း သိရသည်။
ဖမ်းဆီးရမိသော မူးယစ်ဆေးဝါးရောင်းချ၊ သုံးစွဲသူ ၂၈ ဦးအား ဆိုင်ကယ် ၁ဝ စီးနှင့်အတူ ဘိန်းဖြူ အလေးချိန်(ဝ ဒသမ ဝ၁)ဂရမ်ခန့်ပါ တစ်ထုပ်၊ တီဗွီတစ်လုံး၊ CCTV ကင်မရာ လေးလုံး၊ CCTV အထိုင်စက် တစ်စုံ၊ အဝေးကြည့်မှန်ပြောင်း တစ်လက်၊ စနိုက်ပါ မှန်ပြောင်းတစ်လက်၊ ဆိုလာပြားနှစ်ချပ်နှင့် ဘက်ထရီတစ်လုံးတို့ကို သိမ်းဆည်းရမိခဲ့သည်။ ဖြစ်စဉ်နှင့် ပတ်သက်၍ နန်းမားနယ်မြေရဲစခန်းက အမှုဖွင့်အရေးယူ ထားကြောင်း သိရသည်။
နီတိုး
Myanmaalinn
