鍾嘉欣今日喺尖沙嘴The One出席《輕鬆小熊甜蜜小鎮》揭幕禮，佢透露一家三口最鍾意係聖誕節，所以稍後會佈置聖誕樹，仲笑指囡囡可能會搗亂，佢仲話會幫囡囡打扮成聖誕女郎；之後嘉欣同粉絲玩遊戲，模仿小熊可愛動作。
講到嘉欣下月約滿無綫，佢表示一直有同公司傾續約：「我始終唔喺香港住，最重要係穩定性同自由度，我o依家都好頭痛，我喺溫哥華住，唔可以話一接到個劇就可以做，出面都有公司搵我傾，但TVB一定係我首選。」如果搵嘉欣拍劇，對方要唔要支付機票錢同住宿費？嘉欣表示冇諗到咁長遠，佢又指老公唔介意佢繼續演藝事業，只要唔好影響到夫妻感情同小朋友之間嘅關係就冇問題。想唔想再生？嘉欣話：「我希望我哋嘅家庭越來越大，我哋都有諗下個小朋友，但唔一定會有，呢啲係禮物，隨緣！」
提到好友王君馨被發現買性感內衣誘惑老公，嘉欣笑住話：「嘩，好誘惑喎，姊妹同姊妹之間嘅話題透明度會好高，但係我唔會同你講喎！」此外，對於舊愛伍允龍拍劇時，因劇本需要唱歌走音，但就被人投訴，嘉欣笑笑口話：「好難避免，因為佢好專業，好入戲，同埋佢把聲一定好響，我以前同佢有唱過K，佢唱歌好勁，好似張學友。」
 嘉欣下月就同無綫約滿，透露有其他公司向佢招手。(攝影﹕仇志德) |  |  fans玩到瞓晒地，真係好落力。 |
 |  嘉欣俾fans餵食蛋糕，兩個男仔好似仲怕羞。 |  |
 鍾嘉欣一家三口早前被影到一齊返香港。(資料圖片) |  嘉欣話遲啲會幫囡囡Kelly打扮成聖誕老人。(微博圖片) |
