陳凱琳(Grace)最近撇低男友鄭嘉穎，做乖乖女陪爸爸媽媽同細佬去日本大阪、京都旅行，據聞今次仲係由Grace負責畀酒店同機票錢。不過，日前讀者劉小姐就向《蘋果》爆相爆片，話上周六(11號)下午3點左右，喺大阪機場見到Grace一家坐香港快運航空，疑享有特權，唔使排隊就可以特快登機，仲有職員帶入閘。
片中見陳凱琳戴住黑超，同弟弟一馬當先行去登機櫃枱，父母就一直企後排等候。陳凱琳與一男一女職員傾咗一陣，辨理完登機手續後，就由男職員帶領陳凱琳一家去入閘方向，隱約聽到有排緊隊嘅乘客話﹕「因為大細超，佢VIP入閘！」
劉小姐接受電話訪問時話﹕「當時我同朋友正辨理登機手續，職員突然放低我哋啲資料，幫另一位乘客嘅行李掛上priority tag(優先級標籤)，職員就話搵另一個人幫我哋，叫我哋等等。我跟住望一望，原來嗰個係陳凱琳，見佢同職員用傾咗一陣，搞埋手續就跟住個男職員行去入閘方向。我哋條隊係online check-in，都好長龍，唔知佢係咪VIP，或買咗fast pass啦，所以唔使排隊。」劉小姐表示入閘後仍見到陳凱琳一家，原來大家同機，雖然差唔多全機都係香港人，但就冇人特別搵Grace簽名或影相，可能唔想打擾對方。
陳凱琳噚日回覆傳媒時否認有特權，透露自己買咗U-BIZ(Business for HK express)，據了解U-BIZ喺香港國際機場確實係享有優先辦理登機手續及登機，至於外地就冇清楚列明。對被人指有特權，陳凱琳話﹕「唔緊要，最緊要個trip玩得開心，其他嘢唔會諗咁多。」
