娛圈判官黃秋生對於無綫向藝員下「禁奶令」，禁止性感，兩個字講晒：戇居！
秋生今午接受《蘋果》電話訪問狠插無綫：「呢個建議我梗係覺得戇居，佢根據乜去建議先？除非你話女藝人衣着令到公司形象受損、公眾恐慌或公司尷尬，但似乎冇啲咁嘅嘢出現吖！點解只指令女士衣着，唔指令男士衣着呢，咁係咪可以去平機會投訴？咁港姐冇泳衣啦，着潛水衣囉，問題係要知理據，當你做事冇理據就多餘。」
至於指令仲話劇集唔鼓勵涉及強姦或情慾情節，秋生沒好氣斥：「呢樣有（通訊事務管理局）審批，唔係你自己去管，咁仲乜要審批啫，唔使有一個審批制度啦，自己審批晒！以後無綫拍宗教劇、拍兒童節目啦！
「咁唔好拍愛情戲，咁好多嘢意會㗎，打劫嗰場戲意會得啦，死人塌樓意會得啦。有句說話叫只可意會不可言傳，如果不可言傳嘅時候冇戲劇，可以執笠，以後意會有無綫得啦！如果真係執行呢個方法，死梗啦，咁阿茂睇你？佢有權有決定製作方向，但呢間公司係咪變成一間專拍兒童劇嘅公司，創作上影響到乜嘢呢？當然我係外人嚟，關我鬼事咩？我食花生之嘛！」
如果係咁，咁仲有冇興趣睇無綫？秋生不屑話：「早就冇乜人睇啦，佢o依家咁樣！其實搵個理由畀自己快啲執笠。」仲有冇興趣返無綫拍劇？秋生表示：「第一，我唔會畀人強姦，亦唔會強姦人，佢立呢個例，對我冇乜關係。我拍劇唔會做強姦犯，所以佢呢啲規條對我冇影響。
「我係多口，但我唔明、觀眾都唔明，可能公司入面製作同演員都唔明，呢個指令條尺喺邊？性感就大鑊啦，着到好密實都性感㗎！好似煒哥陳煒咁樣，佢着到點都性感喎，咁點算呀？不如話無綫演員以後唔准吸引人，唔准出名，唔准成名，直情炒晒嗰班、搵臨時演員算啦，演員都冇得用呀以後，拍空氣啦！」
秋生認為無綫要分清楚性感、肉感同暴露嘅分別：「着得少叫暴露，未必係性感，我睇完嗰段嘢都唔知佢想點，三點式未必一定性感，可能作嘔、嘔心。我覺得你性感就炒你魷魚，呢份嘢有啲色情眼光。
「成個公司咁大決策，上面好多食飽飯屙唔出諗出嚟，講出嚟都畀人鬧，乜嘢叫適當時候加T裇，完全係空泛到唔知佢想點，係咪歧視女性身體？係咪覺得女士身體肉酸要冚住？即係覺得0依家製作部好多嘢賣弄啦，但製作梗係想多人講，唔通無色無味無聲無臭，佢係咪畀啲女藝人投訴得多呀？係咪迫啲女藝員除衫呀？可能背後有故事，我唔係無綫人，佢可能出發點係啱，但表面出嚟成份嘢戇居咁解。」
