胡鴻鈞、何雁詩、陳明恩、謝雪心今日到金鐘港鐵站月台出席港台舉辦長者港鐵安全運動2017活動，與長者分享及玩遊戲。

噚日無綫向藝員發出通告，收緊拍攝製度，列出六點有關安排，內容包括不鼓勵拍戲劇及非戲劇性感拍攝、賣弄色情，要搣甩情慾、床上、強姦等情節，女藝員離港拍攝非戲劇製作節目，如得自己一個女藝人，藝員部要派人跟進，所有激情性感畫面只以意會形式交代，同以前喜歡性感製作做賣點製度大相徑庭，咪神亦變得無用武之地。

最近喺劇集《降魔的》露股上陣嘅胡鴻鈞，佢話：「拍嗰陣都擔心觀眾反感，會諗唔好啦收番埋，但見到網民意見都好正面。」佢仲話自己天生股肌比較勁，唔使點操，亦唔介意吸納多啲男粉絲。對於公司向旗下藝人下令禁性感一事，胡鴻鈞直認噚日收到公司通知：「係保護女藝人，保護我哋，想大家注意成個節目製作，而唔係藝人身材。」係咪發生咗啲咩事？佢就話：「唔知道，相信呢個係整體大方向，作為有責任社會企業，希望唔好將太多focus擺喺身體上面，呢樣係好事。」

另外謝雪心同樣收到公司訊息，佢覺得公司做法係保護大家，尤其係女藝員，喺出埠各方面都係好出發點。係唔係有啲不愉快事件發生咗？心姐話：「冇喎，我拍劇集多，好少出trip。」講到近年無線劇集就多咗好多祼露情節，心姐話：「我唔覺得好多，可能有啲未睇，黃金時段出得街都好穩陣。」講到劇情偏向好多咀戲同親熱，心姐就話 ：「咀嘴冇所謂啦，係劇情需要，兩個人發展係要按照劇情，又唔係強吻。」咁作為家長會唔會覺得呢啲對小朋友唔好？心姐話：「 相信有一定尺度，喺我尺度ok嘅，我拍劇集為主，認為冇乜過火位，公司錫住我哋啫。」


胡鴻鈞相信禁性感係整體大方向。攝影：陳俊強謝雪心