無綫掌管藝員管理及發展嘅助理總經理樂易玲，噚晚向全台藝員同事發咗一個工作守則，稱不鼓勵有太誇張或者賣弄身體的性感鏡頭，指引包括，劇集同節目上，都唔鼓勵有強姦或者床上情慾戲嘅情節，甚至需要著三點式拍攝，會喺適當時候要著上T恤。
守則一出，唔少藝人當然撐公司話係好事，但係亦有網民留言，聲稱戥嗰啲平時慣咗性感嘅女藝人擔心，覺得呢個守則會影響佢哋嘅曝光率。
查實有唔少旅遊節目，喺介紹當地名勝美食嘅時候，順道都會介紹水上活動，又或者浸吓溫泉，好似之前森美同高海寧、黃心穎同麥美恩主持嘅《森美旅行團》，其中有一集係講森美同高海寧、黃心穎齊齊浸溫泉，未播已經嘩聲四起，之前無綫節目巡禮，都特別揀咗呢個shot嚟播，引起話題。
森美當然都知守則呢單嘢，佢今日接受傳媒訪問時話：「我睇咗喇，我諗係保護啲女藝員，好似有陣時啲導演想要女演員性感啲，可能有啲新嘅演員，佢嘅底線係高啲，又或者（對住啲）要求多啲嘅，唔夠膽say no。如果有呢個條例，咪保護咗啲女演員，等佢哋有個依歸say no。」
森美仲話：「不過，你問我0依家仲有冇呢啲情況出現，我見到嗰啲溫泉都唔係好賣弄性感，好正常，好似《森美旅行團》，高Ling同心穎用毛巾包都實晒，仲高過佢哋平時套晚裝，所以肯定唔關我哋事！」又打趣謂：「因為我平時啲晚裝係見唔到腹肌，我就反而係性感演出，我睇吓幾時出個指引係俾我哋啲男演員，好似我同陳豪都好有機會太性感！」
 (電視圖片) |  高ling同心穎喺節目有浸溫泉場面！(電視圖片) |  森美話佢自己最性感！(電視圖片) |
 (電視圖片) |  (電視圖片) |  (電視圖片) |
 (電視圖片) |
