陳嘉寶(Anjaylia)一直堅守信仰，23歲先第一次談戀愛，聽日就同拍拖4年嘅半億初戀男友黃頌祈(Epaphras)拉埋天窗，踏入人生另一階段喇。
婚前有好多事要忙，Anjay日前就搵埋男友一齊返電視城派喜糖同小禮物。當日上午11點左右，見Anjay同未婚夫將車泊喺電視城門外，Anjay坐喺車上，逐盒逐盒小禮物咁簽名，真係好費心思。而未婚夫就拎住三大個紙袋，裏面有心型嘅大盒裝同粉紅色加絲帶嘅小包裝，入咗去唔多兩個鐘先完成派餅任務。
上周日下午近五點，Anjay喺澳門出席完賽車活動後返港，記者喺上環港澳碼頭再遇見Anjay，見佢一個人去買咖啡，不停㩒電話，個樣好似好苦惱咁款。記者上前講恭喜，Anjay都不停講多謝，佢話﹕「好高興，但都驚啲嘢做唔切，可能越近婚期會再緊張啲。」由於婚宴撞正《TVB馬來西亞星光薈萃頒獎典禮》，有部份藝人朋友未能出席，Anjay直認冇咗兩、三圍枱，佢話﹕「都有影響，有啲冇咗半圍，有啲又冇半圍，加埋就成兩、三張枱，所以係咁調動，還好我未婚夫嗰邊請多咗人，咁佢都多朋友。」
問到佢好多賓客未能出席有冇唔開心？佢話﹕「唔會，希望佢哋攞到獎返嚟，到時再食飯。(會唔會再搞私人party？)搞呢個都夠攰喇，到時先算啦。」
 (採訪、攝影：徐錦池、畢紹基) |  Anjay日前就搵埋男友一齊返電視城派喜糖同小禮物。 |  Anjay同未婚夫將車泊喺電視城門外，Anjay坐喺車上，逐盒逐盒小禮物咁簽名。 |
 Anjay喺澳門出席完賽車活動後返港，記者喺上環港澳碼頭再遇見Anjay。 |  見佢一個人去買咖啡，不停㩒電話。 |  |
