港區人大換屆選舉正式開鑼，噚日舉行首次選舉會議，確定選舉會議主席團、選舉安排等細節。早前政圈流傳多份不同版本的候選人「推薦名單」（或稱「祝福名單」），盛傳譚志源及鄺美雲呼聲高。
其實早於本月初，已有傳聞指江西省政協鄺美雲仿傚阿姐汪明荃從政之路，對於傳聞，佢一直未有正面回應，只係逐步漏口風話：「其實我每一日都祝福其他人，我都希望大家祝福我，我相信最重要係選委祝福我！」
要得到「祝福」，其實唔難，大家應該仲記得佢之前為維穩／建制派「港人講地」拍片力撐國歌法，話：「你要知道自己嘅根本，你係中國人，你要唱國歌，點解你要做一啲唔尊重，或者好特別嘅行為去抗議呢？我唔知呢啲係乜嘢心態。不過我想話俾大家聽，尊重自己嘅身份，尊重自己係一個中國人，你要感恩自己呢樣嘢。」（新聞連結： http://bit.ly/2mUwUXv
）
要感恩自己係中國人喎……今日鄺美雲到紅磡為新發燒碟《C Again》舉行發佈會，終於有個明確啲嘅說法。
問鄺美雲是否從政選人大？佢話：「係呀，嚟緊政治嘅工作會加重，會喺呢個月底報名。因為唱片公司搞咗呢隻碟，我都希望可以盡責任，出嚟宣傳呢隻碟。」
鄺美雲又話：「我希望可以出多啲力，為國家同為香港做啲事。之前十幾年喺國內都全力做慈善活動，自己都好開心。我希望可以喺工作之餘可以有時間，因為人生如果能夠貢獻自己嘅力量，就係最大嘅快樂。人生匆匆，希望可以多啲服務社會同國家。」
「我希望以後可以多啲以教育去培養人才，喺文化方面，大家可以更加和諧，咁大家心情都會好啲。希望香港整個社會氣氛都會和平共處。如果一個人有110歲，我呢啲已經走咗一大半。」查實，《蘋果》今日都有報道，指前香港律師會會長林新強、中小型律師行協會創會會長陳曼琪、香港與內地法律專業聯合會會長陳曉峰等，以及反佔中功臣如發起撐七警「敬言仁基金」嘅陳亨利，同埋公開撐《國歌法》立法嘅鄺美雲等，盛傳都獲得中聯辦嘅祝福。
談到方逸華離世，鄺美雲稱：「方小姐係我一個好尊重嘅前輩，過往好多見面機會，但最後一次見面都係好耐之前，可能係一年前啦。」她稱不知方逸華病情，只謂每次有慈善活動，都會見到方小姐蹤影。
 攝影：張俊銘 |  | |
 汪明荃從政好多人都知，佢噚日出席「中華人民共和國香港特別行政區第十三屆全國人民代表大會代表選舉會議」（fb圖片） |  （fb圖片） |  （fb圖片） |
