冇咗索女着比堅尼嘅《3日2夜》大家仲有冇興趣睇呢？
無綫原定由明年1月20號起，將《3日2夜》由J2台轉去翡翠台播出。歐陽巧瑩同陳蕊蕊早前已出發去帛琉拍攝最新一輯，預備作為頭炮推出;但10日嘅拍攝行程去到最後兩日，先收到無綫發出嘅「禁奶令」，建議女藝人拍節目着泳衣要外穿一件T-Shirt，但節目已拍得八八九九，重拍根本就冇可能。
據悉製作單位現在都非常頭痛，因為帛琉嘅主景係陽光與海灘，今輯力sell蕊蕊嘅美人魚look，擁有34D噴血身材嘅歐陽巧瑩亦有唔少比堅尼登場，如今要「淨化」，早前《3日2夜》嘅監製張志明亦承認要cut咗歐陽巧瑩裸背做Spa嘅鏡頭，如果再cut埋泳裝環節，可以播出街嘅片段真係所餘無幾。所以監製都極力保留部份比堅尼片段，希望能過到最高層嗰關。
而下周出發去澳洲黃金海岸同開恩茲嘅張曦雯(Kelly)，拍攝內容當然要收斂，Kelly嘅32C魔鬼身材都要着番件潛水衣遮一遮。Kelly噚日接受傳媒訪問時話﹕「我知道要拍潛水鏡頭，咁都會着泳衣嘅。(泳衣着潛水衣裏面？)I'm not sure yet.」
以嘉賓身份出場嘅陳蕊蕊強調美人魚look同泳裝好唔同，希望過到關，佢話﹕「美人魚look唔知當唔當泳裝，但又唔係比堅尼，如要局cut都冇辨法。但去旅行落水都係健康嘅，唔會好擔心。」歐陽巧瑩就話﹕「我冇話好擔心，知道觀眾層唔同咗(J2轉翡翠台)，自己都有心理準備，冇話着啲好勁嘅泳衣。老實講，我係帶咗好多套(泳衣)，但都剩係着咗三套，其中一套仲係一件頭，唔擔心cut好多。」
更多娛聞，喺晒《娛果》
http://fb.com/appledailyent
 大台「禁奶令」矛頭直指《３日２夜》，明年翡翠台將推出淨化版，蕊蕊希望美人魚look有得留低。（互聯網圖片） |  張曦雯過去喺J2版嘅《3日2夜》完全唔介意騷優美身段，如今要淨化，往事只能回味。 |  歐陽巧瑩帶咗好多套泳衣去帛琉，但最後只係着得3套。 |
 |  如果cut晒泳裝，其實都仲有跳傘睇嘅。 |  |
 |  泳衣外加衫，應該係冇問題嘅。 |  |
