美國男星「鷹眼」謝洛美維拿（Jeremy Renner）、陳沖、王菀之、唐詩詠、姜皓文、陳茵媺、楊千嬅、鄭裕玲、林盛斌(Bob)、錢國偉、梁家仁、湯鎮業、原島大地、譚耀文、潘源良、麥嘉欣、葉念琛等，今日現身澳門出席「第二屆澳門國際影展暨頒獎典禮」紅地氈儀式。
任達華、蔡卓妍(阿Sa)、衛詩雅、湯怡與楊受成一齊喺台上影大合照，着住5吋高踭鞋嘅詩雅疑裙腳太長，唔小心自踩自己，老闆楊受成就烏身幫忙整理。任達華與阿Sa一齊受訪，任達華大讚鷹眼係好演員，佢話:「佢一定有睇過我哋套《雛妓》。」身旁嘅阿Sa忍唔住大笑華哥吹水，佢話:「如果冇人都可以集郵，有人就會較尷尬，希望出年可以請到尊尼狄普（Johnny Depp）同畢彼特（Brad Pitt）就仲好。」華哥笑言希望大會請來安琪蓮娜祖莉（Angelina Jolie）做嘉賓。
而EXO成員D.O.出場時現場反應最熱烈，佢話好榮幸可以參加盛會:「希望可以享受，好有幸福感覺，目前準備下一步電影，希望大家支持。」而今年共有9部來自以色列、中國、英國、阿根廷等地嘅電影進入競賽單元，頒獎禮會於本月14日在澳門文化中心舉行。
 (攝影﹕曾小嘉) |  任達華話「鷹眼」應該有睇佢同阿Sa主演嘅《雛妓》，即被阿Sa取笑吹水。 |  |
