吳浩康《LISTEN TO DEEP Live 2017》今晚喺九展開騷，黃依汶同老公陳國坤、劉浩龍、梁烈唯、洪卓立等捧場，之前Deep就話遇到「飛機友」差啲要倒貼十幾萬，最終喺開場前靠朋友散晒啲飛（詳見：http://bit.ly/2kKeuIo），而呢晚入座率接近爆滿，到8點半左右開騷。


Deep西裝煲呔look，在升起高台打鼓、彈結他solo，搞氣氛暖場，眼見身形fit過之前，隨後唱出第一首歌《火》，邊唱邊打拍子跳少少簡單舞步。


為求突破，演唱會前Deep曾指會同麥秋成合作諗舞步，Deep第二首歌就由麥秋帶領同Dancer跳舞，唱出《感覺蘇豪》。唱快歌狀態普通，但接住唱《討厭》時啲歌係佢情歌，觀眾即有共鳴，俾晒掌聲歡呼鼓勵，Deep亦鞠躬謝意。唱《孩子王》、《棋王》都投入狀態，觀眾勁歡呼。


之後觀眾拍掌，Deep話：「我今年34歲，等咗34年就係得咁多掌聲？點解我叫Deep，從小到大得一個願望，想做歌星，唔係歌手，歌手去邊度唱都一樣，歌星要企喺台上，所以我花幾多時間心機都要企番喺度，多謝你哋帶我上嚟。好多人話我生性十年前已經喺度，我唔知咩timing，o依家就係好值得，冇乜好抱怨，我等咗30幾年仲可以企喺度，咁有咩要怨。多謝大家今晚一路帶住我走，陪住我走，從來冇諗過有人等我開騷，希望唱到大家鍾意聽嘅歌。」觀眾聽完都為佢感動，拍晒手掌。


唱咗一連串情歌之後，有啲歌詞係唱錯，Deep講笑話：「係咪唱錯好多歌詞，係就俾啲歡呼我。今日我專登唔睇歌詞唱歌，想投入啲，過去幾首歌好抱歉，唱得唔太好(指《第三者》、《浪漫時代》、《擇日失戀》)。因本來只得一場，有大家加咗場，所以即使綵排時間緊迫，都膽粗粗試下，綵排時個個叫我留聲，但我有個缺點，唔識留，好似今晚咁送晒俾大家。」然後話曾經音樂路上有唔同嘗試，又有同佢打拼嘅人，然後介紹佢隊band closer 出場，一齊表演。


(攝影：陳俊強)Deep西裝煲呔look
Deep唱番自己舊歌喺現場好好反應。
演唱會前Deep曾指會同麥秋成合作諗舞步唱咗一連串情歌之後，有啲歌詞係唱錯