王君馨繼創立首飾品牌後，近日同設計師合作推出全新服裝品牌，今日正式面世，喺圓方搞咗個宣傳活動，Grace身穿自家品牌現身。
Grace指服裝品牌籌備咗八個月，投資七位數字，比起經營首飾生意成本高：「因為衫褲設計之後都改咗好多次先滿意，所以成本都貴。」有份投資亦有份參與設計，一落手先發覺比想像中多步驟，要兼顧尺碼、剪裁、線條：「首飾反而唔使諗太多，自己概念揸得最緊係容易襯衫。」
Grace會sponsor身邊一班好姊妹，不過講到叫佢哋幫手做代言拍廣告，Grace話：「佢哋太貴喇，搵一個其他又會唔開心，但一次過要四、五個要再傾下。」
服裝品牌有機會進駐地鋪或商場，Grace正尋覓合適地方，經營唔止一門生意，Grace話：「我諗我做埋鞋就可以完成，要請教好朋友。」Grace又話視演戲為首，生意只係興趣，所以不會放棄演藝事業。咁真係要搵個信得過嘅人幫手睇檔先好喎。
今個聖誕Grace話：「係第一年可以同老公一齊度過，諗緊煮啲咩聖誕大餐一齊分享，自己會花心思，因為我老公好鍾意自己屋企整嘢食。」
 |  |  |
