現年34歲的徐天佑和黃又南，在18歲那年組成Shine，明年是他們成立15周年，決定重組於3月踏紅館舉行「Shine Moments Live演唱會2018」，天佑更為此進行地獄式操弗。

其實Shine曾在07年拆夥，因為2012年應黃偉文邀請現身演唱會，勾起大家集體回憶，迴響大而決定合體開騷。入行轉眼15年，有甚麼想和當年18歲的自己講？又南坦言：「嗰時太細個，好多嘢好順利，覺得理所當然，經歷過之後，呢行係要積穀防饑，一定要不斷增值。」天佑則說：「嗰時成日話呢行係遊樂場，好開心，但過咗幾年，我同經理人講呢度係一個戰場。但咁多年後，畀我講番句，真係要當呢度係遊樂場咁玩，先至會有意義。」

問當年為何選擇離開這個戰場？天佑說：「首先經歷公司變動，我哋去完台灣返嚟，出到街，啲人好似唔係好認得自己，因為太耐冇出新歌，唔知點去繼續打呢個市場，不如停一停。」又南則說：「嗰時我哋覺得為做而做，上到台好刻板式唱歌，去到樽頸位要消化。」
那麼可曾因為灰心失意想轉行？天佑承認：「我記得我試過，出道時最想有home studio，結果真係畀我儲到錢，喺屋企使好多錢去做，到06、07年決定唔做音樂，將屋企啲機啲線抆晒塞入床下底，有個心態好似情侶分手咁，跟住我走去寫吓小說做幕後，兜兜轉轉又做番幕前。」又南就沒有想過離開：「因為我好鍾意呢行，我係坐唔定啲人，你叫我返朝九晚五，我諗一早已經炒老細魷魚。」

不少組合因不和拆夥，二人可有試過反面？天佑爆：「以前試過出騷彈唔彈結他、唱邊首歌，大家喺車度不瞅不睬。喺日本特訓時，因為生活習慣好唔同，試過嗌交佢話去助手度住，唔會嚟我度食飯。」天佑笑問又南：「你記唔記得我哋點講番嘢？過咗個幾禮拜，有日放學大家喺劍擊舖撞到，我話：『打機呀？』你話：『你家同我講嘢呀？』小朋友咁，之後大家原諒大家。」
可有想過之後15年的Shine會如何？天佑說：「記得有個做舞台劇朋友話：『喂，你60歲時唱《燕尾蝶》會點呢？』我即刻思考，60歲唱《祖與占》會點呢？所以如果15年後，好期待見到呢個畫面。」