許廷鏗（Alfred）今日到新城為新碟《神奇之旅》宣傳，早前Alfred已經有一系列旅程宣傳，分別到過新加坡、馬來西亞同大陸，嚟緊聖誕前夕又到舟車勞頓去另一地方宣傳，佢話：「今次會返江門做簽唱會，我都唔知原來江門都有我嘅歌迷，希望遲啲有機會係大陸開演唱會。」
Alfred話總結今年成績都好滿意：「始終係下半年先出碟，所以算係有交代。」佢又透露計劃2019年進軍紅館：「我噚日睇完周國賢演唱會，早排又睇咗陳柏宇，好多人都問幾時到我，我同公司都傾緊，希望可以再儲多啲作品，等我喺紅館台都可以企得穩啲。」
唔講唔覺，呢一兩年好多50歲以上嘅前輩喺紅館開騷，之前有汪明荃、鄭少秋，之後有86歲嘅胡楓打破埋最年長紀錄，如果Alfred成功進軍紅館，咁就可以拉低番平均開騷年齡喇。（新聞連結：http://bit.ly/2AtlUCN
）
