熊黛林（Lynn）、馬時亨、林建岳同朱薰一家等，今晚喺九龍灣出席《柏靈頓2》首映禮，Lynn懷孕後首次現身公開活動，着住鮮紅色背心連身裙嘅Lynn着咗對4吋高踭鞋，肚凸凸現身，出入都小心翼翼要人扶住。Lynn透露已經懷孕5個月，但暫時唔透露BB性別，預產期喺明年，仲話決定喺香港生。
Lynn話懷孕初期好辛苦：「之前一日抱住個廁所嘔，起唔到身，因為自己身體差，反應大，成個月同老公冇乜講嘢，真係唔好意思，冷淡咗對佢咁，我咁辛苦佢都心痛，又幫唔到手，都嘔咗3個月。」
Lynn仲話姑奶郭可盈同家人不時都有提點叫佢小心，奶奶仲日日煲湯畀佢補身，老公郭可頌就唔畀佢出街，問到今日着咁高嘅高踭鞋，怕唔怕畀老公鬧？Lynn就話：「唔會，平時我好乖，做嘢要靚嘛，佢平時都叫我唔好出街。不過今日冇畀佢睇，唔會有事嘅，我着慣高踭鞋。」不過訪問完後，Lynn就話見暈，要休息一陣先再接受其他媒體訪問。
講到戒口，Lynn就話依家都食得清淡，仲話間唔中都會想食麻辣火鍋，佢話：「對我嚟講唔係好辣，又會突然想食甜。」問到陀B咁辛苦想有啲乜嘢獎勵？Lynn話：「生咗先，最想BB健康。」佢仲話希望生多啲，暫時兩個先，問佢係咪生到仔為止？佢就話：「睇吓點，冇所謂。」最後問到舊愛郭富城都祝福佢，Lynn就話：「係咩？多謝。」
另外，朱薰同老公帶埋5歲囝囝同1歲多嘅囡囡去睇戲，朱薰話個仔兩歲起已經開始帶佢睇戲，不過喺戲入面都會學到啲粗言穢語，佢會即時阻止教導。問到會唔會生第3個？朱薰話：「夠數嘞，收爐！夠皮！o依家都差唔多唔夠時間陪佢哋。」
 （攝影：沈健程） |  Lynn喺工作人員攙扶下現身 |  佢話懷孕初期勁嘔 |
 出入都有人顧住Lynn，好有太后出巡feel。 |  |  已經陀B有5個月，Lynn個肚都好凸吓。 |
 隻熊好似想同Lynn講：乜你飲得咩？ |  喺側邊睇，Lynn個肚仲凸。 |  嗰頭話着4吋高高踭鞋冇事，轉頭就話見暈，Lynn真係要保重。 |
 朱薰一家四口都有嚟睇戲 |
