陳敏之做咗人妻之後，演出反而更大膽，除咗《性在有情》同張兆輝有床戲外，最近熱播嘅《溏心風暴3》，佢同唐文龍嘅婚外情戲就更加激，繼日前一場火辣床上纏綿戲後，噚晚佢仲主動除剩喱士黑Bra「獻身」，搞到唐文龍欲拒還迎，最後激吻到浴室，以電視尺度嚟講都算好大膽。


陳敏之、陳華鑫同林秀怡今日以聖誕女郎look到葵興宣傳《性在有情》，敏之透露噚晚老公冇睇，但有同媽咪一齊睇，原來仲尷尬，佢話﹕「我用棉被包住自己，點知媽咪睇完講咗句『你實畀老爺奶奶鬧』！咁佢哋好開通，唔會鬧我嘅。」敏之直言希望老公可以「避一避」，佢笑言﹕「始終係老公。」


敏之都覺得《溏心》係從影以來最激、最Heavy嘅一次，佢話情節需要，所以唔受限奶令影響。問到囝囝子樂喺電視認唔認得媽咪？佢話﹕「認得，好多時見到海報都會嗌媽媽，佢知媽媽係演戲，大個啲就可能會打文龍，話佢蝦媽咪，我都好期待，覺得咁樣好sweet！」


提到囝囝日前1歲生日，好友周家蔚都有帶埋兩個仔一齊去玩，問到家蔚心情有冇受老公(洪天明)拖女事件(新聞連結：http://bit.ly/2C8Tm1M)影響？敏之話﹕「佢好開心，冇嘢。」敏之表示聖誕節會帶囝囝去睇燈飾，畀佢感受香港人嘅聖誕節氣氛。



(左起)林秀怡、陳敏之同陳華鑫一齊宣傳《性在有情》。