7歲吳奇隆發展大陸市場多年，估計只係今年就賺咗6.4億（約1.7億港元）。賺得多，使得多。台灣《蘋果》收到讀者報料話，吳奇隆今年喺新北市嘅新莊豪宅「京雅苑」，一口氣買咗四個單位，一個自用，另外三間就分俾兄弟，新屋依家仲裝修緊！點解揀台灣最多奇案發生嘅新北市？因為吳奇隆喺呢度長大0架嘛。
嘩，吳奇隆真係咁豪？早於上月，《台蘋》已有報道指吳奇隆用1.9億元（約5千萬港元）買下新莊「京雅苑」四個單位，當時唔知佢係炒賣定自住（新聞連結：http://bit.ly/2DnudlC
）。再仔細求證後發現，吳奇隆呢四個單位，確係一間同老婆自住，另外三間係分別給俾父母、哥哥同細佬。
依家吳奇隆既已娶大陸妻劉詩詩，又長駐北京搵人仔，其實同大陸人都冇乜嘢分別啦——咁又唔係喎，北京有霧霾，台灣未有吖嘛。但係呢，吳奇隆兩公婆暫時都未有plan搬去台灣住嘅（究竟應該係「搬返」定「搬去」？）好矛盾。
三兄弟中，吳奇隆排第二。佢話細個嗰陣爸爸對佢特別嚴格，哥哥同細佬考試80分都有獎金，吳奇隆考唔到90分就會俾人打，因為咁，所以兄弟間以前係冇偈傾嘅。大個之後，當然唔同晒啦。最初吳奇隆去北京開餐廳，就係由爸爸同哥哥幫佢睇檔。
講開睇，吳奇隆因為拍戲長年面對強光，加上又鍾意煲劇，且長時間入剪接室又篤手機等等，之前已被醫生警告「有失明之虞」。為此吳奇隆今年特地回台到大醫院做檢查，醫生就話冇失明咁嚴重，但提醒佢少啲面對強光，所以吳奇隆明年應該會減少拍片量，多作投資，包括台灣影視圈喎。
