吳君如同吳鎮宇合作拍過唔少電影，今日佢哋上到嚟《今日ENT》同大家開Facebook Live，一開始佢哋仲互問對方做過嘅電影問題，第一題由鎮宇問君如：「《古惑仔》入面o靚坤由邊個殺死」君如就答：「十三妹，邊個記得o架？做咗幾廿次，做咩啫你o依家？」鎮宇：「錯啦灣仔槍神。呢啲懲罰嚟！」君如戴上彈彈眼鏡。之後到君如問：「首次做導演...」鎮宇搶答《四面夏娃》。不過答錯咗，正確答案係《妖鈴鈴》，而鎮宇嘅懲罰就係戴上聖誕帽。一連問咗幾個問題君如同鎮宇都答錯。
之後有網民問到佢哋今次合作《妖鈴鈴》有咩意思，鎮宇就話：「例如你喺香港打求救電話係999，你喺國內就『么么鈴』嘛。」君如就話：「呢個係食字啫，如果作法就要有個鈴收妖，不過叫《妖鈴》又唔係幾好聽，咁咪叫《妖鈴鈴》，搞掂！」又有網民問到佢哋合作多年，係咪真係好friend？鎮宇笑話：「梗係啦！我哋仲娛樂圈，梗係真愛嚟啦！」佢仲作撞錫老友君如o添。
佢哋又再繼續互問，當鎮宇問：「我首次做導演嘅戲係咩？」君如真係答中咗《九死一生》：「好改唔改改啲咁嘅名？」到鎮宇問：「《朱麗葉與梁山伯》我係做咩職業？」君如答係蠱惑仔，鎮宇就搖頭，鎮宇再畀tips之下君如估中咗係扯皮條。鎮宇就話：「我記得唔係，黃、賭、毒佢冇涉及。」最後一個問題，君如問：「我喺邊套戲女扮男裝？」鎮宇答中就係《金鴨》。
又到網民問題，問到佢哋有咩花名？君如就話：「吳金如囉！」鎮宇就爆：「佢咪吳太囉！叫親佢都叫吳太，打嚟話係吳太，真正嘅吳太又唔叫自己做吳太，唔係吳太呀係陳太。」君如就話：「我唔鍾意做陳太，咪叫做吳太。你花名係咩呀？」鎮宇話：「我咪靚仔囉！」之後君如同鎮宇都係姓「吳」，君如回想：「啲人好鍾意幫姓吳改花名，我細佬叫『唔咩長』、『唔紅』嗰啲，有冇呀？你冇？」鎮宇諗咗一陣：「冇呀！」
有網民問君如今次執導後，會唔會考慮轉去做多啲做導演，一向爽快嘅君如直言：「做！有得做，當然做，攞兩份人工，點解唔做？」未知鎮宇係唔係唔慣做live，有啲呆滯，之後鎮宇笑笑口咁話：「佢(君如)做導演，佢啲friend就比較麻煩啲，佢做導演呢……」君如插嘴：「有咩麻煩，你冇錢收咩？」鎮宇賣口乖講：「冇麻煩，幾好！第二部都搵我哋。」
問到君如今次做導演，鎮宇有咩評價，君如話只可以用三個字去形容，鎮宇話係「快狠準」，鎮宇話：「佢好『狠』在一場戲明明拍完咗，佢都可以拍四次，殺青咗，恭喜殺青咗三次，之後大家都問係唔係真係殺青，係唔係好『狠』呀，吳君如又拍，我又拍。」之後仲爆鎮宇花名叫「超級無敵揼波鐘」，佢要食飽先可以開工，君如話自己要負責成日去o氹鎮宇，要買啲好嘢俾鎮宇。
鎮宇覺得君如拍喜劇嘅節奏比陳可辛好，君如附和：「係囉！成日俾陳可辛搞亂檔攤。」鎮宇笑指陳可辛唔知喜劇人係做緊啲咩，但當陳可辛知道原來係咁嗰陣，俾嘅意見就會更加好，君如幫口講：「如果講拍戲嘅功力，當然係陳可辛好。」君如想出年有機會被提名「最佳新導演」。
君如嚟緊聖誕做宣傳，今年預咗被人玩，鎮宇笑言大家任玩，君如唔敢發脾氣，君如質問：「我幾時有發過脾氣？」鎮宇望住去另一邊先講：「你個女話俾我聽嘅，哈哈！我都費事爆咁多嘢，呢啲屈得就屈。」鎮宇話囝囝Feynman要考試，聖誕唔去旅行，佢要教囝囝數學，囝囝好崇拜佢，君如問鎮宇：「叫『Freeman」定『Feynman』?」
君如興奮指囡囡陳是知睇咗《妖鈴鈴》差唔多十幾次，鎮宇稱君如囡囡係一個好好嘅公關，帶咗好多小朋友上嚟影相，包括邱淑貞囡囡、甄子丹啲小朋友睇製作過程，鎮宇續道：「嗱！我哋睇咗個製作過程，首映又帶埋邱淑貞囡囡呀，就會話你睇拍出嚟就係咁。」君如喺側邊喪笑：「係呀！我囡囡o依家已經做緊我PR。」鎮宇大聲咁講：「佢個女唔會放過佢，走去做導演唔理我，佢(君如)成日中港台走嚟走去就係咁，你再係咁，哈哈哈哈…自己去台灣玩三日…你哋再試吓，我自己離家出走。」君如指未試過一套戲由陳可辛監製，自己就去拍，兩個人一齊離家出走咁多個月，囡囡一詐型，嚇到君如有時要早機去晚機返港，雖然囡囡有成日去探班，但要返學就冇得成日見。
君如同鎮宇指今次《妖鈴鈴》搵咗化妝大師陳文輝個孫去做特技化妝，佢哋第一日見到輝哥個孫都好感動，因為輝哥三代都為君如同鎮宇塊面化妝。
 攝影：沈健程 |  吳君如同吳鎮宇合作拍過唔少電影，今日佢哋上到嚟《今日ENT》同大家開Facebook Live。 |  |
