又到聖誕！又到聖誕！
聖誕節真係一年之中最有節日氣氛嘅日子，除咗周圍都有大小慶祝活動、百貨公司減價，Party就一定唔少得啦！Shine嘅黃又南、徐天佑呢排忙緊明年演唱會綵排，聖誕都可能要喺工作中度過，所以佢哋打算約朋友提前慶祝，就當係忙碌之前俾自己輕鬆下。天佑同又南，為咗喺Party可以成為最突出一個，仲特登走去學變魔術，諗住可以喺Party度搶鏡。Magic！
講到點樣先可以喺Party突破，天佑話造型要特別，提議又南扮聖誕樹，但又南話咁咪即係全晚企喺度？呢個時候，負責教Shine魔術嘅係魔術師Miss Hunny，就提議佢哋不如學魔術啦！天佑仲即刻話自己係「魔術男」添！
咩魔術最有綽頭？又南同天佑都話簡單、容易，人哋一睇到就會好驚喜嘩嘩聲嘅就最好，所以Miss Hunny教又南利用一樽水變魔術。點變？Miss Hunny先叫又南用一隻手攞住一樽水，打開蓋後用掌心按住水樽口，「施法後」就將水樽倒轉，第一次「變」就成功嘅又南，將水樽倒轉後，啲水果然唔流出嚟，Miss Hunny就提醒又南，呢個就係扮型嘅好機會。咁一句攞住個樽？當然唔係啦！又南係咁意施咗個法，就輕易將水倒出嚟喇！真係好Magic喎！
又南就玩水，咁天佑玩咩好？估唔到Miss Hunny教佢玩「波波」咁大膽喎！天佑話：「呢個魔術係比男士們搵喺Party揾女仔『抄牌』用嘅，簡單魔術就可以同女仔打開話題，我結咗婚唔啱用啫，但都想其他單身男士學到嘢嘅！」
Miss Hunny首先叫天佑吹漲一個Party必備嘅汽球，然後準備一個手提電話，根住叫天佑一手攞電話，一手攞汽球，再將電話大大力咁塞入個汽球度，天佑好叻仔，一次就成功，不過已經係人夫嘅佢，似乎真係忘記咗追女仔嘅技倆，竟然忘記咗問女仔攞電話，就將汽球篤穿，攞番個電話出嚟，連佢自己都講笑話：「嗱，咁我其實就錯過咗機會架喇！」又南就講笑話都唔係冇機會，可以叫女仔跟自己去學變魔術。
 攝影：沈健程、影片：廖達燊 |  Shine嘅黃又南、徐天佑為咗喺Party可以成為最突出一個，仲特登走去學變魔術。 |  |
