吳業坤同何雁詩噚晚去觀塘出席音樂活動，由坤哥做評判，佢笑指唔會因為參加者係靚女就加分，對人係一視同仁、公平公正。
坤哥直言今年聖誕節過得好平淡，上年就落寞啲，自己一個人出咗去旺角行咗一陣就返，今年反而唔想出街，留咗喺屋企打機，但係有妃約埋啲fans搞咗個飯聚，問到聖誕冇人約?坤哥話：「今年聖誕冇人約，我都好宅，朋友都遠離我。」
早前譚嘉儀投訴被「block」，噚日係Boxing Day，就玩食字，被問有冇女仔再投訴佢喺社交平台「block」人，坤哥語帶雙關：「佢話我block佢，不過我冇衝動block佢喇，聖誕節冇衝動都唔知幾時有衝動。」講完自己喺度笑……
講到係唔係佢之前「block」得太多朋友，聖誕先冇朋友約，坤哥解釋：「唔係!因為佢哋要工作，佢哋都忙，(許廷鏗佢哋成班人都有開party噃?)可能我比較宅，同埋過幾日頒獎禮有得見。」
胡鴻鈞日前指坤哥年年拎「我最喜愛歌手」，今年叫佢唔好拎讓出嚟，坤哥聽完就話：「呢個都唔係大家爭，係大家投票出嚟，我覺得佢(胡鴻鈞)今年都好大勝算，佢咁紅，反而叫佢留番啲工作畀我就真。」
