一年一度樂壇頒獎禮，由前晚舉行的港台「第40屆十大中文金曲─我和你音樂會」作終結，前晚除有陳奕迅（Eason）驚喜現身捧獎，港台更請來譚詠麟及郭富城任嘉賓。推job撐港台的城城直言目前重心在電影，又首度開腔表示不會再參與頒獎禮爭獎，阿倫則以「大器晚成」形容今年掃走14.5個獎的克勤。
樂壇頒獎禮一年比一年遜色，商台及港台頒獎禮均出現「妹仔大過主人婆」情況，叱咜靠謝霆鋒、Eason首尾包抄做神秘嘉賓掀高潮，港台前晚舉行的「第40屆十大中文金曲」，則請到Eason現身捧獎，還有樂壇校長譚詠麟及十多年沒有現身頒獎禮的郭富城撐場，才令頒獎禮變得有生氣。
有指如今樂壇頒頒禮沒有巨星參與很失色，貴為天王的城城認為兩者無關：「唔關事，我哋唔參與都有一班新人參與，可能係時代轉變咗，呢個係一個事實，聽歌嘅渠道比以前寬好多，變相參與頒獎禮嘅市民比以前係唔同咗，成個時代嘅生活節奏唔同咗，唔可以用以前指標去懷緬以前係點樣，只可以展望將來，超越一個更加好嘅樂壇。」他又認為樂壇只要有好歌，便會永遠不死。
城城坦言今次是推job才能現身，他說：「經理人小美好明白，我哋係一個不忘初心嘅人，大家都係二話不說就答應，就算我未講，小美都會知道，大家都知道一定會去幫手，同埋表演。綵排時大會要求係保密，最開心見到以前打歌成日都會見到嘅DJ，當時做宣傳成日都見。」
不過，城城坦言以後不會參與頒獎禮，「雖然我冇official講，但咁多年見我唔再出席，其實都知發生乜事。我嘅重心係喺電影世界嘅時間比較多啲，以歌手嘅身份，就係我自己嘅演唱會、世界巡迴為中心，有時唱啲主題曲，出碟冇時間限制，以前一年可能要出三張唱片，喺家嘅樂壇已經冇可能。」
講到城城在樂壇及影壇都奪得過最大的獎項，城城即說：「唔可以咁講，唔同嘅時間，應該訂立一個自己嘅指標，譬如當你拎到一啲獎項，對你下一個目標，要求應該更加高，不斷進步同學習，闖出高峯，更上一層樓。」
阿倫在台上被問到當年首次站在頒獎台唱歌的感覺，他說：「當時係諗將來，因為我係新人，但估唔到我個將來係咁長，同埋都幾好成績、幾輝煌。」他又寄語新一代歌手：「唔好諗咁多，唔好想將來，想好今日先，做好今日嘅自己，先諗將來。」
講到克勤今年奪14.5個獎，阿倫笑一笑說：「大器晚成！我頭先喺後台廁所門口個更衣室頒咗個獎畀佢，因為喺廁所有大獎同細獎，一大獎一細獎頒咗畀佢啦，係真嘅，你哋唔信？」問阿倫可有叫克勤記得在更衣室拿走個獎？阿倫又搞笑地說：「試過一次漏咗，呢啲陳年往事仲記得，使唔使叫佢插旗？」他講完笑再讚克勤：「唔怕！家大個仔，唔怕呢啲嘢。」
