浸大學生因為喺抗議校政期間爆粗鬧教職員，兩位學生最終受到停學處分。好多人都談論緊學生做得啱定唔啱，馬浚偉都喺facebook撰文，話學生應該尊師重道，「不管是什麼原因、理由、動機、又或是你們有多深多大的苦衷，浸會大學那一群同學們，你們真的做錯了！」、「可以用其他和平有理有禮的方法向校方、或社會公眾提出或公開申訴！」
敢於表達自己心聲嘅藝人，仲有杜汶澤。佢今日喺facebook簡短地出咗個status，話終於發覺facebook好多老人家：「見到咁多人出鬧學生嘅post，我先至信，Facebook係廢中同廢老玩嘅。」
杜汶澤原本都只係呻一呻，有人留言後，佢終於忍唔住：「好多人唔知頭、唔知路，睇少少，一味X，更加唔會體諒。因為自己一世都無做過衰嘢，踩死隻蟻都未試過！所以對其他人嘅道德要求好高。學生嘅未來係屬於佢哋自己嘅！關X佢哋事咩其實！」佢甚至自爆讀書時曾經打過老師。
其實火爆嘅杜汶澤讀書嘅時候出名曳，好彩遇到位開明、了解佢嘅恩師：何韻詩爸爸何德星（菇爹）。菇爹曾經喺訪問講過，杜汶澤好寸好曳，甚至成間學校都唔鍾意佢，就算阿澤唔交功課，差啲被踢出校，菇爹都出面保佢，就係本住有教無類嘅心，唔想學生誤入歧途。呢種教學理念，唔知浸大會唔會參考下呢？
