亞視今日復播喇，除此之外佢哋今日仲喺大埔工業村舉行復播酒會，搵咗好多經典嘅藝人出席。
今日陳志雲病重未能出席，本來佢要同朱慧敏等做大會司儀，問到朱慧敏驚唔驚因為志雲大師嚟唔到而分擔晒啲責任？朱慧敏話：「坦白講，我係其中一個將責任卸落其他司儀身上嘅人，因為我自24號開始就因為聲帶出血而失聲，不過ATV都好好啊，佢哋安排咗我唔使講咁多嘢，同埋之前做舞台劇綵排嘅時候都完全講唔到嘢，不過好彩今日都OK，好感恩，呢件事令我知道身體健康真係好緊要，大家都唔想做唔到個騷，相信Stephen都已經撐到最後一秒，頭先聽同事講佢今日應該發高燒，祝佢早日康復。」
嚟緊朱慧敏將會有唔少節目喺手，會唔會擔心自己頂唔順？朱慧敏就話：「其實我都好驚，因為後日就正式幫ATV做Live，再過一日仲有三場舞台劇，都已經同醫生講定，非常時期用非常手段，有咩問題就會打開聲針。」
陳志雲病咗今晚未能嚟到支持，不過好友王喜如常現身：「我嚟到先知佢唔舒服，佢啲稿一齊分擔啦，真係咁巧合。可能之前佢又要忙舞台劇，又要早起返工，積埋積埋疲累結果。其實聽日都要同佢開會，不過今日咁多位司儀都好有經驗。」問到今日開台會唔會覺得好似大台，佢就話：「咁今日亞視生日，生日歌冇版權o架嘛，邊個都播得，唔播生日歌播咩呢？」佢仲話亞視對佢嚟講好有新鮮感。而佢嘅節目《今晚見》將會喺2月1日開播，逢星期四晚播出。
 （攝影：林賓尼） |  今日陳志雲病重未能出席，本來佢要同朱慧敏等做大會司儀。 |  朱慧敏話：「坦白講，我係其中一個將責任卸落其他司儀身上嘅人，因為我自24號開始就因為聲帶出血而失聲。」 |
 陳志雲病咗今晚未能嚟到支持，不過好友王喜如常現身。 |  王喜：「可能之前佢又要忙舞台劇，又要早起返工，積埋積埋疲累結果。」 |
