本月剛度過39歲生日嘅周杰倫（周董），同太太昆凌結婚已經三年，更火速誕下一女一子，湊成「好」字，大女Hathaway已經兩歲幾，細仔Romeo得7個幾月大，雖然周董夫婦甚少俾子女正面曝光於社交媒體，但不時都見佢哋兩公婆會貼吓家庭照。
今日台灣《壹週刊》有報道指，Romeo其實係經基因篩選、人工受孕得嚟嘅BB，全因周董患有遺傳性疾病「僵直性脊椎炎」，有指因為佢唔想下一代都受呢個病困擾，所以同昆凌決定喺基因檢測聞名嘅婦產科醫學中心度以人工方式受孕。
周董嘅經理人公司杰威爾回覆傳媒查詢時，否認Romeo靠人工受孕而來，並稱：「有得到相關資訊，但還沒有決定，就自然懷孕了。」
此外，昆凌當初陀Romeo時，啱啱拍緊《極智追擊：龍鳳劫》，有唔少動作場面，昆凌仲自爆，佢喺拍呢套戲時，原來有場係講佢俾人毆打，仲要踢肚。本來昆凌打算親自上陣，但遭任達華勸阻，事後昆凌先發現原來當時已經有咗第二胎(文章連結：http://bit.ly/2nmDXpJ
)
……咁即係，如果昆凌真係選擇人工受孕的話，根本就唔會揀有工開嘅時候，令傳聞亦不攻自破。
講開「僵直性脊椎炎」，民主黨許智峯都患有僵直性脊椎炎，其父和叔叔都有呢個病，醫生同佢講病徵屬初期，要多做運動，如果不幸惡化，就有機會令脊椎僵直或變形。
要留意的是，並非全部僵直性脊椎炎患者，都會將病遺傳給後代。數年前美國醫療機構一項統計稱，「僵直性脊椎炎」患者子女發病率是40%，常見於15歲-40歲的男性，男女發病比率約為14：1。
亦有患者稱，二十多歲確診患僵直性脊椎炎，遵從醫生吩咐多做運動，特別是游泳，因為水的浮力可減少脊椎壓力，故卅載從不間斷。
