本來要準備宣傳鄭保瑞執導嘅賀歲電影《西遊記之女兒國》嘅林志玲，自從上月頭同Angelababy參加大陸綜藝節目《王者進擊》、貼咗張合照唔小心洩露咗Baby鞋踭出蠱惑玩「僭建」，以拉近同林志玲身高距離，之後都冇見佢現身。其社交網就間唔中更新，但都係貼下之前影落嘅工作相，行蹤神秘。


身在台灣嘅林志玲，原定會喺今個月4號跟《西遊記》大隊去北京出席首映禮，6號嚟香港首映兼做訪問之後，就會馬不停蹄跑大陸宣傳。今日突然傳來消息，稱其因為身體抱恙，要暫時停工。


據知林志玲係俾感冒菌打敗仗，在家休息，連落床力都冇力，醫生建議佢暫時停工。


投資《西遊記》嘅星皓影業公司，今午接受《蘋果》訪問，承認收到林志玲嘅經理人Julia通知，稱林志玲因為病，所以無法做宣傳。


星皓負責人陳小姐表示：「噚晚收到林志玲經理人電話，話志玲身體好唔舒服，嚟緊一兩個月工作全部都要取消，好抱歉，包括接住落嚟嘅宣傳都唔可以參加。詳細情況冇追問，希望佢早日康復，要保重注意身體。」陳小姐話志玲方面冇特別透露病情，但係既然身體咁唔舒服，當然健康為重。


其實林志玲拍《西遊記》期間，亦吃了不少苦頭。佢喺戲中飾演河神，同梁詠琪較多對手戲，兩人仲有一段情。每次化妝都要用6個鐘，更引致皮膚敏感。


林志玲拍《西遊記》飾演河神。每次化妝都要用6個鐘，更引致皮膚敏感。
原定會喺今個月4號跟《西遊記》大隊去北京出席首映禮，今日突然傳來消息，稱其因為身體抱恙，要暫時停工。