阿嬌今日凌晨貼出婚戒相，大大粒鑽石閃令令，天后嘅下一站係：幸福！
阿嬌原定6點到達惠英紅今日喺灣仔開嘅會場，不過塞車記招要一再延遲，喺阿嬌未到之前，經理人霍汶希（Mani）就先出嚟視察環境，佢話阿嬌以為只係傾兩句，冇諗過係set晒機set晒枱，佢仲話阿嬌見到應該會幾驚訝到擘大個口得個窿。
阿嬌落車時披住一黑色大毛毛衫禦寒，見記者時終於除咗件褸，中空長裙加埋紅色大扇形耳環非常搶眼。
講到求婚，阿嬌初初都有啲失手好緊要，冇戴婚戒出嚟令佢有啲尷尬，仲要雙手掩面。始終都係開心事，講到未婚夫，佢就一路讚對方有幾好，表情就越嚟越自然，仲笑得好燦爛。訪問完畢，小紅姐出嚟抱抱，仲有一個kiss，幾咁風騷。
另外呢，唔少阿嬌嘅fans湧到去阿嬌未婚夫——台灣醫界王陽明賴弘國嘅ig留言，祝福之餘，個個不厭其煩咁，叮囑賴生要好好錫住阿嬌，要對佢好好好好好，例如話：「拜託你一定要用最好的待阿嬌，絕對不能讓她再受傷了，一定要讓嬌幸福，拜託了。」、「請一直守護嬌嬌的幸福」、「一定要好好對她，不准欺負她，不要讓她傷心，請好好珍惜她。」、「你要永遠對她好喔！你要讓她幸福下去」、「請你一定要好好照顧好愛我們的嬌公主。一定要讓她幸福快樂。謝謝。」
去到晚上11點05分，阿嬌滿面笑容步出酒店，有唔少fans喺門外守候，而阿嬌直接登上七人車回家。
最港電影大獎投票網址
http://bit.ly/thekongestfilmawards
精選娛聞，喺晒《娛果》
http://fb.com/appledailyent
