張子丰導演、董敏莉（Monie）、張惠雅（Regen）、尹光、韓星李敏豪，噚晚喺奧海城出席電影《吃貨神探之獵獸行動》首映禮，李敏豪戲中講普通話對白，佢話自己都識啲普通話，事前亦有搵中文老師教背對白，所以冇咩難度。而拍攝地點主要集中喺茶餐廳，李敏豪笑話：「我喜歡吃點心，拍攝過程中吃了很多茶餐廳食物。」
張子丰話自己第一次拍電影：「以前拍MV，今次想國際化，所以搵咗韓國、德國、內地演員，雖然係唔同國際，但拍攝冇咩大困難，好似李敏豪咁，事前背好對白，現場臨時改對白亦會明白，拍攝好順暢。我亦好感激Monie、Regen畀出友情價，我哋呢部係本地戲，成本唔大。」
Monie戲中演茶記老闆，而Regen就演伙記，同韓星李敏豪都有好多對手戲，Regen笑話：「今次呢部戲成日拍通宵，我哋都拍到殘晒，但李敏豪拍極皮膚都咁靚，所以我同Monie都有偷睇佢點護同用咩化妝品。」講到友情價演出，Regen話：「當日我單飛出嚟，張子丰都同樣係新人，今日見佢拍到第一部電影，一定要支持。」
Monie本身開咗間配對公司，佢話今個情人節要工作中度過，而Regen同男友分手踏入第三年，佢話有興趣去配對派對。
 韓星李敏豪今次要挑戰普通話對白，佢話自己有跟老師學。 |  張惠雅（左）同董敏莉話有偷偷睇李敏豪點護膚 |  董敏莉話情人節要喺工作人度過 |
