曾志偉、米雪、余安安、阮兆祥同余慕蓮今日去到樂富，參加慈善盆菜宴，與千位長者預祝新年，志偉、米雪同祥仔負責點睛儀式。


志偉表示農曆新年同過往14年一樣，到美國拉斯維加斯過年，之後到大陸繼續拍戲。而今年大計係幫代言餅食80周年，製作一個以感恩為主節目，佢先透露有好友譚詠麟做嘉賓，一向眼淺嘅志偉預計自己會被感動到喊，節目會到日韓等幾個國家拍攝。


提到古天樂接棒演藝人協會會長一職（新聞連結：http://bit.ly/2EPlOIM），志偉透露係佢三顧草蘆成果，協會委員得知人選即大讚有耳目一新感覺，並一致通過，志偉話：「古仔係我哋創會中最年青嗰位，喺現在年輕一輩中係最成熟。食咗3次飯，最後一次佢問我點解要搵佢，我話兩個字『有心』，o依家香港10部戲，有8部係佢投資，我又知佢有個基金私下做好多善事。」當選嗰晚，古仔宴請大家食飯兼分享自己睇法，呢兩個禮拜已經不停為會開會。


同場嘅米雪就透露剛為4月份同夏雨、關菊英等合作舞台劇影造型海報，米雪指舞台劇以喜劇為主，有別於之前劇情內容，佢最擔心係演出時忍唔到笑，佢話：「我要不停用指甲『咪』住自己啲肉，等自己唔好笑出來。」




志偉同米雪等今日出席盆菜宴睇舞獅志偉、米雪同阮兆祥一齊為醒獅點睛
余慕蓮（左二）都有份參加今日活動