37歲嘅台灣藝人安以軒去年嫁澳門百億CEO陳榮煉，老公雖然係大忙人，但噚日係佢哋婚後首個情人節，陳榮煉好有心，專登飛去台灣會合老婆一齊慶祝，真係夠晒體貼又浪漫。


安以軒見愛郎都悉心打扮，穿上寫住「愛」字嘅長版T恤，搭配及膝長Boots，無懼近日天氣轉冷。安以軒先去set頭，而老公一落機就到髮型屋會合，兩人一見面就好似接吻魚咁kiss kiss，跟住就好甜蜜咁手拖手，拎住幾袋禮物返屋企。


安以軒接受台灣《蘋果》訪問時，透露老公專登來台灣陪佢慶祝情人節，佢話：「這是婚後第一個情人節，特別有意義的是，今天是我大妹登記結婚，又是小年夜，還能陪陪家人。」陳榮煉貴為澳門德晉集團CEO，自己忙到不可開交，仍願意抽空為愛妻兩地奔波。


據悉佢哋今朝一早就返澳門同陳榮煉嘅爸爸及姐姐一齊過年，初二老公又陪返娘家，初三又趕返澳門出席活動。對於老公呢份心意，安以軒當然好感動，佢甜絲絲咁話：「他昨天晚上很可愛的，一過十二點立刻祝我情人節快樂。」


講到噚日係安以軒妹妹登記結婚嘅大喜日子，既然老公係兆豐年鐘錶嘅老闆，身為老闆娘嘅安以軒特別為一對新年訂製一對手錶，安以軒喺微博留言：「婚後第一個情人節2/14，是情人節、是小年夜，更是我親妹登記結婚的日子～把自己的大妹嫁了，我和姐夫送你們對錶，希望你們的幸福的婚姻和6.5年的愛情是像時間一樣永遠不會停下。（特別在手錶的背後刻上倆人的英文名字和2-14-2018）， 情人節這樣過太值得紀念 。」



陳榮煉專登飛去台灣同老婆慶祝情人節。(台灣《蘋果日報》提供圖片)安以軒將會「愛」字掛上身。(台灣《蘋果日報》提供圖片)(台灣《蘋果日報》提供圖片)
安以軒祝賀妹妹結婚。(微博圖片)(微博圖片)