蕭定一旗下嘅王宗堯、陳詩慧同雨僑日前就相約喺荔枝角食開年飯，雖然佢哋3個未合作過，但私下其實好老友，做訪問時默契十足，仲話想狗年可以一齊創作搞啲嘢。
王宗堯、陳詩慧同雨僑特登唔食中式開年飯，去咗間西餐廳食芝士火鍋開年，貪個鍋金黃色，喻意金銀滿屋。問佢哋過農曆新年有咩必做嘅傳統嘢？陳詩慧就話係打牌，王宗堯同雨僑隨即附和道：「係呀，佢係賭方面嘅專家，最有研究。」陳詩慧笑住話：「新年食完餐飯，最好就係玩吓射龍門、打牌嗰啲，真係好興奮！其實人生同射龍門真係好似。我吔玩好細，1、2蚊玩玩叿就變咗幾百、幾千。」
講到錢，雨僑話每年公司嘅周年晚宴，最唔想就係中大獎：「抽到大獎嗰個藝人好慘㗎！聽聞話抽中之後，試過成年冇嘢做。今年我好緊張，因為之前啲細獎抽極都冇我份，最後得番5個人，好彩我都係中咗三獎5,000蚊咋，不過陳詩慧就年年都抽中headphone囉！」王宗堯就話每年必定行花市、還神同還庫，陳詩慧即搶住話：「同佢行花市要好似G4咁，好多好多人同佢影相，仲要經常性叫我揸機。」
至於佢哋嘅狗年大計？雨僑希望可以造歌：「下年係入行完整10年，都幾開心嘅。我都想下個10年仲可以繼續做，電影、拍劇、唱歌，拍片上網我都想，開騷我就冇乜自信，如果開10周年busking就隨時可以啦。至於KOL嘅工作，我都會繼續做落去，好似返工咁返，又要指又要剪，仲做埋監製。」
陳詩慧話狗年除咗做多啲電影音樂之外，自己仲多咗個身份：「我有3胞胎，佢哋係我姪仔姪女，我成日都會抽時間陪住佢哋。我都有諗過結婚生仔，阿媽都叫我生，其實我想生個混血兒，邊個係爸爸唔重要，真係想生，去（精子）銀行都得啦。」
王宗堯話之前因為選角問題延期嘅《作家的謊言》終於可以開番：「好開心，因為呢team人一齊好有默契，個劇本其實冇停過，過年後就開鏡。另外，我想喺自家平台拍啲香港網劇，我都會參與創作㗎！」
 陳詩慧（左）、王宗堯同兩僑約埋一齊開餐慶新年。 |  相機食先，是常識吧？ |  王宗堯過年後就會為新作開鏡 |
 陳詩慧話希望生仔，至於即將嫁人嘅雨僑就話想先造歌。 |
