愛情來了，自然會發生，雨僑和羅力威的愛情，以龜速進行。早前佢接受《蘋果》專訪，佢就話：「我哋好慢好慢咁開始，所以好似最近嘅訪問，都有人問幾時開始，真係唔知，但係好似係由求婚開始，先係確定一個身份，所以佢係好多年之前，好認真同我講呢個關係，已經係求婚，唔會話我哋係咪拍拖，我哋係咩關係。」
在羅力威求婚確立關係之前，佢哋都係玩下情，雨僑話：「係，咁又都係，我哋約出街都好少真係兩個人，多數都有朋友，所以感覺好似好慢，人哋拍拖會成日見，睇戲食飯，好快就好確定嘅關係，維持幾耐真係唔記得，反而有時有新聞，有謠傳，我哋係冇感覺咁滯，都係食吓飯，唔係好過份嘅嘢，我哋係好和平同平靜嘅關係。」
咁羅力威究竟係幾時求婚？雨僑話：「幾年前，唔記得，係好感動，係送戒指，我係喊晒，好開心，嗰個真係確立我哋關係嘅日子，真係確定就結婚喇！」雨僑喊晒係咁答應羅力威，係咪等咗好耐？佢話：「因為覺得佢都幾快求婚，之前佢做訪問，er得好長嗰個，其實佢真係講晒佢要講嘅野，拍拖就等如要結婚，要求婚㗎喇！我係覺得呢件事，呢個觀念好感動，我哋從來唔影相，整咗張土製合照，整咗張咭。」
雨僑仲講到佢鍾意羅力威啲乜嘢：「佢真係好細心喇！係咁數佢優點，又好似好難，我哋真係互補不足，有啲嘢我真係好驚，咁嗰啲嘢佢全部唔驚，但係佢驚嘅嘢，我唔驚，我可以幫佢捉晒啲曱甴，我就船頭驚鬼船尾驚賊，我唔見啲咗啲乜嘢，佢永遠可以幫我搵得番，眼睫毛夾嗰條膠佢都知，真係互補不足，我好大意佢可以幫我，佢寡斷嘅時候，我可以幫佢決定，好配合。」
講到雨僑同羅力威嘅平淡愛情，都唔係無風無浪，2012年佢哋喺機場俾人影到外遊返港，當時雨僑老闆蕭定一嬲到話羅力威係「二打六」，仲冇咩人睇好佢哋呢一對，雨僑解釋：「其實佢係從來都唔反對拍拖，佢又一早就知，佢唔係唔知道，唔係十幾歲偶像，睇咗報紙先知嗰啲，但係有一段時間佢好心痛，點解會咁樣俾人話我哋做新聞，兩個俾人影到係佢哋嘅事，呢啲新聞做到係啲策略性嘅野指到公司頭上就唔得。」
當時嘅雨僑會唔會覺得左右做人難？佢話：「冇呀！成件事佢唔係反對我哋一齊，佢只不過係唔開心，人哋咁樣覺得做新聞，佢為我嘅感情，婚姻，佢知道每一件事都戥我開心，決定結婚好快通知佢。」咁老闆蕭定一o依家又點睇羅力威呢？雨僑話：「老闆對佢都係正常，佢覺得結婚拍拖，唔係講對方，有唔有錢，所以佢最緊要係我幸唔幸福，講到策略新聞，呢啲嘢佢就唔想。」
其實除咗老闆有微言，當年羅力威嘅粉絲都好激進，群插雨僑，佢話：「其實我最唔記得係呢啲新聞，其實睇佢公佈婚訊嘅事，我先記得有咁嘅嘢，後其佢哋對我嘅好，我已經唔記得咗之前嘅唔好，o依家佢哋變咗姨姨級，會煲湯俾我，我唔舒服，佢哋會煲葯俾我，究竟佢哋係咪全部反對，我唔知，我見到嗰啲買好多嘢俾我，煲嘢俾我，買啲好適合我嘅嘢，好似買早餐咁，佢哋對我好照顧我，好似親人咁樣。」
拍拖7年，終於修成正果，雨僑苦盡甘來：「我哋好開心，最初我哋係冇理大家反對定係支持，繼續係咁，但係大家都支持，都咁開心，咪好囉，我哋覺得啲時間真係過得好快，冇咩鬧過交，係得一次，佢真係好嬲，因為我哋大家都好少發脾氣，可能大家都唔係第一次拍拖喇！有啲就忍，一係就唔好喺埋一齊，只會係大家磨合，有一次真係意想不到，我係佢屋企煲咗一煲粥，諗住一齊食，拎俾佢又睇電話、睇電視、睇電腦冇表示，咁我咪食完一碗又一碗，食晒佢，無晒，跟住佢係廚房見到，靜默咁行出來唔出聲，係咁講整完粥又唔俾我食，原來佢勁嬲，超級嬲，咁多年來最嬲，就係我煲粥，我食哂，好好笑！」
雨僑打分俾未來老公羅力威，仲好肯定咁話佢一定係一個好丈夫：「大家好樂意做家務，樂意照顧頭家，買餸，都會一定會一齊，唔會話你係黃面婆自己搞掂佢，我哋兩個係鍾意親力親為過家庭生活，照顧屋企，俾99分啦！因為人人都有多一分進步。」
由地下情到行入教堂，雨僑對呢份情寄予厚望，佢話：「愛情最難，唔係話平時互相激死對方，有時又o氹到不得了，我哋都唔係呢種人，係恆常嘅付出，一個持續嘅付出，生活上總唔會每一樣嘢都係睇得順眼，大家預到分歧點樣去遷就，將來話結咗婚就老馮，咁希望唔會，會互相珍惜大家。」
最後雨僑對羅力威的愛的宣言係幫老公殺死所有曱甴：「因為其實係之前，宣佈好正式，好正統，打咗落去都delete番，你要好保護我，我都會好保護你，幫你捉晒啲曱甴。」
 |  雨僑形容佢同羅力威嘅愛情，以龜速進行。 |  |
